ABŞ BMT-ni izləmədiyini bəyan edir
Bakı, 31 oktyabr (AZƏRTAC). ABŞ-ın hakimiyyət orqanları BMT Katibliyini inandırmağa çalışmışdır ki, Amerika kəşfiyyatı bu ümumdünya təşkilatının rabitə kanallarına nəzarət etməmişdir və bundan sonra da nəzarət etməyəcəkdir.
Bu sözləri BMT Baş katibinin rəsmi nümayəndəsi Martin Nesirki jurnalistlərə müsahibəsində səsləndirmişdir.
O demişdir: “Bu məlumatlar (ABŞ xüsusi xidmət orqanları tərəfindən izləmələr barədə) avqustun sonunda daxil olmağa başlayanda biz bildirdik ki, bu məsələni müvafiq ölkələrin hakimiyyət orqanları qarşısında qaldıracağıq. Deyə bilərəm ki, biz ABŞ-ın hakimiyyət orqanları ilə həqiqətən əlaqə saxlamışıq. Mən biləni onlar təsdiq edirlər ki, BMT-nin rabitə kanallarına nəzarət edilməmişdir və bundan sonra da nəzarət edilməyəcəkdir.
BMT Baş katibinin nümayəndəsi diplomatik missiyaların toxunulmazlığı prinsipinə riayət edilməsinin zəruri olduğunu xatırladaraq bildirmişdir ki, bu prinsip “beynəlxalq hüquqda yetərincə dəqiq ifadə edilmişdir.
M.Nesirki demişdir: “Odur ki, bütün ölkələrin özlərini müvafiq qaydada aparacağını gözləyirik”.
ABŞ-ın Milli Təhlükəsizlik Agentliyinin BMT-nin əlaqə kanallarına, o cümlədən daxili videokonfranslara yol tapması barədə məlumatı avqust ayında Almaniyanın “Der Spiegel” həftəlik nəşri yaymışdır. Nəşrdə Mərkəzi Kəşfiyyat İdarəsinin keçmiş əməkdaşı Edvard Snoudenin növbəti ifşalarını dərc olunmuşdur.
Nəşrin yazdığına görə, Amerika kəşfiyyatının əsas izləmə hədəflərindən biri elə BMT-nin iqamətgahı olmuşdur.
Bölmənin digər xəbərləri
