ABŞ-da 5-11 yaşlı uşaqlar üçün COVID-19-a qarşı vaksin bəyənilib
Vaşinqton, 3 noyabr, AZƏRTAC
ABŞ Xəstəliklərə Nəzarət və Profilaktika Mərkəzi koronavirusa qarşı Amerikanın “Pfizer” və Almaniyanın “BioNTech” şirkətlərinin birgə istehsalı olan preparatla 5-11 yaşlı uşaqların vaksinasiya olunmasına icazə verib.
AZƏRTAC xəbər verir ki, Mərkəzin Məşvərət Komissiyasının üzvləri göstərilən preparatın iki dozası ilə uşaqların vaksinlənməsinin tövsiyə edilməsinə yekdilliklə səs veriblər. Məşvərət Komissiyası səsvermənin nəticələrini elan edəndən bir neçə saat sonra Xəstəliklərə Nəzarət və Profilaktika Mərkəzinin direktoru Roşel Valenski bu vaksinin azyaşlı uşaqlar üçün tətbiq edilməsinə razılıq verib. Mərkəzdən alınmış məlumata görə, indi təqribən 28 milyon uşaq qısa müddətdə vaksinasiya olunmaq hüququna malikdir.
Bu yaşda olan uşaqlar üçün vaksinin bir dozasının həcmi yaşlı insanlar üçün nəzərdə tutulan dozanın təqribən üçdə bir hissəsinə bərabər olacaq. Vaksinin ikinci dozası üç həftə intervalla vurulacaq.
ABŞ Prezidenti Co Bayden oktyabr ayında bildirib ki, ABŞ hökuməti ölkədə 5-11 yaşlı uşaqların hamısını COVID-19-a qarşı vaksinasiya etməyə hazırdır. Baydenin sözlərinə görə, valideynlər vaksinləri səbirsizliklə gözləyirlər.
AZƏRTAC-ın Vaşinqton bürosu
Bölmənin digər xəbərləri
