ABŞ DÖVLƏT DEPARTAMENTİ DAŞKƏNDDƏKİ TERROR AKTLARINI PİSLƏMİŞDİR

31.07.2004 [12:17]
Çap et
A⁺ A^-

Birləşmiş Ştatlar Daşkənddə törədilmiş terror aktlarını qətiyyətlə pisləyir. AZƏRTAC-ın İTAR-TASS agentliyindən aldığı xəbərə görə, bunu iyulun 30-da mətbuat konfransında Dövlət Departamentinin rəsmi nümayəndəsi Adam Ereli bildirmişdir. O, terrorçu kamikadzelərin İsrailin və ABŞ-ın Daşkənddəki səfirlikləri yanında, habelə Özbəkistan Baş Prokurorluğunun binasında törətdikləri partlayışlara öz ölkəsinin münasibətini açıqlamışdır.

A.Ereli demişdir ki, ABŞ səfirliyinin əməkdaşlarından heç kim xəsarət almamışdır, çünki Amerikanın xaricdəki bütün diplomatik nümayəndəlikləri bu cür cinayətlərdən qorunur.

Dövlət Departamentinin nümayəndəsi etiraf etmişdir ki, Daşkənddə terror aktlarını kimlərin törətdikləri barədə suala hələlik cavab verə bilməyəcəkdir. Lakin İTAR-TASS-ın Beyrutdakı müxbiri bildirmişdir ki, hökumət əleyhinə çıxan “Özbəkistanın islam hərəkatı” gizli qruplaşması bu partlayışlara görə məsuliyyəti öz üzərinə götürmüşdür. Onun bəyanatı islam vebsaytlarında yayılmışdır.

Ərəb telekanallarının icmalçıları ekstremistlərin Üsəma ben Ladenlə əlaqələri olduğunu istisna etmirlər.