ABŞ-ın Con Hopkins Universitetində Qara dənizin təhlükəsizliyi mövzusunda konfrans keçirilib
Bakı, 26 yanvar, AZƏRTAC
ABŞ-ın nüfuzlu Con Hopkins Universitetinin Blumberq Mərkəzində Xəzər Siyasəti Mərkəzi və Qafqaz və Mərkəzi Asiya Klubunun təşkilatçılığı ilə Qara dənizin təhlükəsizliyi mövzusunda konfrans keçirilib.
Azərbaycanın ABŞ-dakı səfirliyindən AZƏRTAC-a bildiriblər ki, tədbirdə bu ölkənin müdafiə katibinin köməkçisi Selest Vallander və hökumətinin üzvləri, beyin mərkəzlərinin, eləcə də beynəlxalq təşkilatların nümayəndələri iştirak ediblər.
Konfransda üç il davam edən fəaliyyət və planlaşdırmadan, Bolqarıstan, Rumıniya, Macarıstan və Moldova ilə əldə olunmuş razılaşmaların nəticəsi kimi Türkiyənin regional qaz tədarükçüsü mənbəyi kimi meydana çıxması, eləcə də qardaş ölkənin təbii qaz idxalı infrastrukturunun gələcək inkişafı, həmçinin Cənub Qaz Dəhlizi vasitəsilə Avropaya əlavə həcmdə qazın çatdırılmasının mümkünlüyündən danışılıb.
Konfransda çıxış edənlər Qara dənizin əhəmiyyətini vurğulayaraq, Azərbaycanı və Gürcüstanı nümunə göstərib, bu ölkələrin Qara dənizin, sadəcə, karbohidrogen resurslarının kəşfiyyatı və istismarı üçün istifadə oluna bilməyəcəyini sübut etdiyini diqqətə çatdırıblar. Bərpa olunan enerji, xüsusilə külək enerjisi üçün böyük imkanların mövcudluğu qeyd olunaraq, Qara dənizin altı ilə çəkiləcək sualtı elektrik kabelinin Cənubi Qafqaz və Avropa İttifaqı enerji bazarları arasında əlaqəni gücləndirəcəyi, enerji bazarlarının mövcud nəhəng külək resurslarından faydalana biləcəyi vurğulanıb.
Bütün bunların Azərbaycanın COP29-un növbəti ev sahibi olması ilə daha vacib əhəmiyyət kəsb etdiyi, ölkəmizin özəl sektorla və bir sıra digər dövlətlərlə təmiz enerjiyə keçidlə bağlı öhdəliklərinin daha da artırılması, birgə fəaliyyət vasitəsilə iqlim hədəflərinə nail olunması üçün Azərbaycanla əməkdaşlığın səbirsizliklə gözlənildiyi bildirilib.
Konfrans zamanı Cənub Qaz Dəhlizinin 2018-ci ildən etibarən tam şəkildə fəaliyyət göstərməsinin son dərəcə vacibliyi vurğulanıb, tərəfdaşlar tərəfindən 2027-ci ilədək dəhliz vasitəsilə çatdırılacaq qazın həcminin iki dəfə artırılması üzərində işlərin görüldüyü qeyd edilib. Bütün bunların Avropa İttifaqının güclənməsi kontekstində Rusiya yanacaqlarından asılılığının mərhələli şəkildə aradan qaldırılması planının bir hissəsi olduğu diqqətə çatdırılıb. Eyni zamanda, Türkiyə və Rumıniyanın enerji təhlükəsizliyinin gücləndirilməsi, bu sahədə idxaldan asılılığın azaldılması üçün Qara dənizdə ofşor qazma əməliyyatlarının genişləndirildiyi vurğulanıb.
Bölmənin digər xəbərləri
