ABŞ-IN DÖVLƏT KATİBİNİN ANKARAYA SƏFƏRİ BAŞA ÇATMIŞDIR
Xəbər verdiyimiz kimi, fevralın 5-də Ankaraya işgüzar səfərə gəlmiş ABŞ-ın dövlət katibi Kondoliza Rays Türkiyə Prezidenti Əhməd Necdət Sezər, Baş nazir Rəcəb Tayyib Ərdoğan, Baş nazirin müavini və xarici işlər naziri Abdullah Gül, Ankarada səfərdə olan Rusiya Federasiyasının xarici işlər naziri Sergey Lavrov ilə görüşlər keçirmişdir.
Xanım Kondoliza Rays fevralın 6-da Ankaradan yola düşərkən Esenboğa hava limanında Türkiyənin xarici işlər naziri Abdullah Güllə birgə mətbuat konfransı keçirmişdir. Jurnalistlərin suallarına cavab verən K.Rays səfərdən və aparılan danışıqlardan məmnunluğunu bildirmişdir. O demişdir ki, Ankaradakı görüşlər zamanı İraqda və Əfqanıstanda vəziyyət, Yaxın Şərqdə sülh və əmin-amanlıq yaradılması, Kipr problemi, ABŞ-Türkiyə münasibətləri, Türkiyənin Avropa Birliyinə üzvlüyü və digər regional və beynəlxalq məsələlər haqqında ətraflı fikir mübadiləsi aparılmışdır.
Türkiyənin kütləvi informasiya vasitələri Kondoliza Rays ilə Sergey Lavrov arasındakı görüşə də xüsusi diqqət yetirmişdir. Üç saata yaxın davam edən görüşdə Rusiyadakı demokratik proseslər, Ukrayna və Gürcüstandakı vəziyyət, Ermənistan-Azərbaycan, Dağlıq Qarabağ münaqişəsi, beynəlxalq terrorizmlə mübarizə, İranın nüvə proqramı, ABŞ və Rusiya arasında energetika sahəsində əməkdaşlıq, digər regional və beynəlxalq məsələlər barədə söhbət getmişdir.
Bölmənin digər xəbərləri
