ABŞ-IN TÜRKMƏNİSTANLA HƏRBİ-TEXNİKİ ƏMƏKDAŞLIĞI ÇOX PERSPEKTİVLİ HESAB EDİLİR

30.07.2004 [19:08]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, ABŞ Silahlı Qüvvələri Mərkəzi Komandanlığının başçısı Con Ebizeyd Türkmənistanla hərbi-texniki sahədə əməkdaşlığın daha da genişləndirilməsini çox perspektivli hesab edir.

General Türkmənistan Prezidenti Saparmurad Niyazovla görüşdə demişdir: “ABŞ hökuməti, terrorizmlə mübarizə də daxil olmaqla, regional təhlükəsizliyin təmin edilməsi məsələlərində Türkmənistanla əməkdaşlığa böyük əhəmiyyət verir”.

Görüşdə regional təhlükəsizlik problemləri və sərhədlərin qorunması, narkotik maddələrin daşınması ilə mübarizə sahəsində hərbi-texniki əməkdaşlıq məsələləri müzakirə edilmişdir. S.Niyazov onun ölkəsinə hərbi-texniki yardım göstərdiyinə görə ABŞ-a təşəkkürünü bildirmişdir.

C.Ebizeyd Mərkəzi Asiya ölkələrinə səfər edir və Daşkənd, Düşənbə və Bişkekdə də olmuşdur.