ABŞ İSRAİL QOŞUNLARININ FƏLƏSTİN ƏRAZİLƏRİNDƏN ÇIXARILMASINI TƏLƏB ETMİŞDİR
Birləşmiş Ştatlar İordan çayının Qərb sahilində və Qəzzə bölməsində fələstinlilərin nəzarəti altında olan rayonlardan bütün İsrail qoşunlarının çıxarılmasını tələb etmişdir. ABŞ dövlət departamentinin rəsmi nümayəndəsi Riçard Bauçer jurnalistlər üçün müntəzəm keçirilən brifinqdə demişdir: “Biz, İsrailin rəsmi şəxslərinin bəyan etdikləri kimi, qoşunların tamamilə çıxarılmasını görmək istəyirik və onları buna təkidlə çağırırıq”. Bauçer vurğulamışdır ki, Təl-Əvivin bu cür hərəkətləri “regiona vasitəçilik tapşırığı ilə gəlmiş ABŞ-ın xüsusi elçisi general Entoni Zinninin işini xeyli yüngülləşdirərdi”.
ABŞ xarici siyasət idarəsinin əməkdaşı həmçinin bildirmişdir: “Vaşinqton bir daha aydın şəkildə xatırladır ki, Fələstin milli muxtariyyətinin rəhbəri Yasir Ərəfata müəyyən ümidlər bəsləyir. Biz istəyirik ki, o, zorakılıq, terror əməlləri törədən və atəş açan radikal qruplaşmaların hücumlarına son qoyulması üçün var qüvvə ilə səy göstərsin”.
İTAR-TASS-ın yaydığı xəbərdə deyilir ki, Amerika diplomatının sözlərinə görə, Birləşmiş Ştatlar “Yaxın Şərqdə son günlərdə baş verən faciəli hadisələrdən və zorakılığın güclənməsindən ciddi narahatdır”. Bauçer nəzərə çarpdırmışdır ki, “hər iki tərəf nizamasalma prosesində tərəqqi əldə edilməsinin mümkün olmasına şərait yarada biləcək addımları təxirə salmadan atmalıdır”.
Bölmənin digər xəbərləri
