ABŞ KİPRDƏ KEÇİRİLMİŞ REFERENDUMUN DEMOKRATİKLİYİNƏ ƏMİN DEYİLDİR

27.04.2004 [13:43]
Çap et
A⁺ A^-

AZƏRTAC-ın Assoşieyted Press Agentliyinə istinadla verdiyi xəbərə görə, ABŞ Dövlət Departamentində güman edirlər ki, Kiprin birləşdirilməsi məsələsinə dair referendumun keçirilməsi ərəfəsində adanın yunanlar yaşayan hissəsinin hakimiyyət orqanları ölkə vətəndaşlarına təzyiq göstərmişlər.

ABŞ Dövlət Departamentinin mətbuat katibi Riçard Bauçer bildirmişdir ki, Nikosiya adanın birləşdirilməsinin əleyhdarlarına teleefirdə bunun tərəfdarlarına nisbətən daha çox vaxt vermişdir. O demişdir ki, Vaşinqton seçicilərə hətta cismani təzyiq göstərildiyi barədə də məlumat almışdır.

Xatırladaq ki, aprelin 25-də Kiprdə keçirilən referendumda yunan icması nümayəndələrinin təxminən 75 faizi adanın birləşdirilməsinə “yox” demişdir.