DÜNYA
ABŞ KOSMİK KƏŞFİYYAT İDARƏSİNİN SABİQ ƏMƏKDAŞINA QARŞI YENİ İTTİHAMLAR İRƏLİ SÜRÜLMÜŞDÜR
ABŞ Milli Aerokosmik (peyk vasitəsilə) Kəşfiyyat İdarəsinin bir sıra dövlətlərin xeyrinə casusluqda şübhəli bilinərək, ötən il həbs edilmiş sabiq əməkdaşı Brayan Rigenə qarşı yeni ittihamlar irəli sürülmüşdür. O, İraq, Liviya və Çin kimi ölkələrə məxfi məlumatlar verməyə cəhd göstərməkdə təqsirləndirilir.
İTAR-TASS-ın yaydığı xəbərə görə, ittiham tərəfinin hazırladığı sənədlərdə bildirilir ki, analitik və şifraçma mütəxəssisi olan Rigen 1999-2001-ci illər arasındakı dövrdə İraq Prezidenti Səddam Hüseynə məktub göndərərək, öz xidmətlərini təklif etmiş və bunun əvəzində 13 milyon dollar istəmişdir. İttihamçıların bildirdiyinə görə, bu sənəddə ABŞ hərbi hava qüvvələrinin 38 yaşlı baş serjantı yazırdı ki, “Sizin ölkənizə (İraqa) tam məxfi informasiya verərək, Birləşmiş Ştatlara qarşı casusluq etməyə hazıram”. Rigenin əməlləri “müntəzəm və ABŞ-ın təhlükəsizliyinə ziyan vurulmasına yönəldilmiş əməllər” adlandırılmışdır.
Brayan Rigen 2001-ci ilin avqustunda Vaşinqtonun Dalles adına beynəlxalq hava limanında yaxalanmışdır. Buradan o, Sürixə uçmaq niyyətində idi. Axtarış zamanı ondan İraqın və Çinin İsveçrə və Avstriyadakı diplomatik nümayəndəliklərinin ünvanları tapılmışdır. Lakin ötən ilin noyabrında Rigen casusluqda təqsirini boynuna almamışdır.