ABŞ-nin Azərbaycandakı səfirliyinin nümayəndəsi: İdman xalqlar arasında dostluğun möhkəmlənməsinə xidmət edir
Bakı, 26 iyun, AZƏRTAC
İdman insanları sərhədlərdən, mədəniyyətlərdən və dillərdən asılı olmayaraq bir araya gətirən ən güclü vasitələrdən biridir.
AZƏRTAC xəbər verir ki, bu fikri ABŞ-nin Azərbaycandakı səfirliyinin müavini vəzifəsini icra edən Mark Hernandez ABŞ–Türkiyə oyununun birgə izlənilməsi münasibətilə təşkil olunan səhər yeməyindəki çıxışı zamanı səsləndirib.
O bildirib ki, tədbirdə Azərbaycanın idman ictimaiyyətinin nümayəndələrini, səfirliyin tərəfdaşlarını və dostlarını bir arada görməkdən məmnunluq duyurlar.
Səfirlik rəsmisi vurğulayıb ki, hansı komandaya azarkeşlik etməsindən asılı olmayaraq, idman insanları rəqabətə, komanda ruhuna və ədalətli oyuna sevgi ətrafında birləşdirir.
Qeyd edib ki, ABŞ-də davam edən “Amerikada İdman Onilliyi” təşəbbüsü çərçivəsində ölkə qarşıdan gələn iri beynəlxalq idman tədbirlərinə və ABŞ-nin müstəqilliyinin 250 illiyinin qeyd olunmasına hazırlaşır. Onun sözlərinə görə, idman beynəlxalq əlaqələrin inkişafına və xalqlar arasında dostluq bağlarının möhkəmlənməsinə xidmət edən mühüm platformadır.
M.Hernandez həmçinin diqqətə çatdırıb ki, 2026-cı il üçün Bakının Dünya İdman Paytaxtı elan edilməsi idmanın gənclərə ilham vermək, icmaları birləşdirmək və əməkdaşlıq üçün yeni imkanlar yaratmaq baxımından əhəmiyyətini bir daha nümayiş etdirir.
O əlavə edib ki, ABŞ–Türkiyə qarşılaşmasının birgə izlənilməsi oyundan zövq almaq, dostlarla yenidən görüşmək və beynəlxalq idman ruhunu birlikdə qeyd etmək üçün gözəl fürsətdir.
Müxbir - Cavid Əliyev
Bölmənin digər xəbərləri
