Bakı, 18 sentyabr, AZƏRTAC

ABŞ Rusiya-Ukrayna müharibəsindən iqtisadi dividend qazanmağa çalışır. Birləşmiş Ştatların müharibəni öz maraqlarına uyğunlaşdırması geosiyasi vəziyyəti daha da gərginləşdirir.

Bu fikirləri AZƏRTAC-a açıqlamasında Sosial Tədqiqatlar Mərkəzinin (STM) sektor müdiri, ekspert Tural İsmayılov səsləndirib.

O qeyd edib ki, ABŞ-ın siyasi oyunları birbaşa iqtisadi maraqlarının təmin olunmasına hədəflənib. Amerikanın siyasi beyin mərkəzləri sıxılmış qazı dünya neft-qaz bazarına çıxarmadığı üçün dəfələrlə tənqidi mövqe nümayiş etdiriblər. Müharibənin qızışması Rusiyanın neft-qaz bazarında təcridinə səbəb olub. Eyni zamanda, Ukraynanın öz məhsullarını ixrac etmək potensialını aşağı salıb. Bu da ABŞ başda olmaqla, Qərb imperialistlərinin dünya iqtisadiyyatını istismar etməsinə şərait yaradır.

Tural İsmayılovun fikrincə, qaçılmaz faktdır ki, Birləşmiş Ştatlar neft-qaz məhsullarını bazara çıxarmaq üçün dünyada müharibə areallarının artmasında maraqlıdır. ABŞ dünyanın hansı bölgəsində neft-qaz istehsal olunursa, ya oranı sabotaj etdirir, ya da təbii ehtiyatları məcburi formada mənimsəmə siyasəti yürüdür.

Sektor müdiri bildirib: “ABŞ-ın apardığı siyasətin nəticəsidir ki, Rusiya-Ukrayna müharibəsi qlobal iqtisadiyyata ziyan vurub, enerji daşıyıcıları bazarlarında sabitlik pozulub. Müharibə nəticəsində inkişaf etməkdə olan bir çox ölkədə ərzaq qıtlığı və yoxsulluq daha kəskin xarakter alıb. ABŞ isə yaranmış vəziyyətdən özünün iqtisadi maraqlarına uyğun istifadə edir”.