ABŞERON RAYONUNDA YENİ NƏSİL ŞƏBƏKƏLƏRİ TƏTBİQ EDİLİR
Rabitə və İnformasiya Texnologiyaları Nazirliyindən AZƏRTAC-a bildirmişlər ki, “Aztelekom” İstehsalat Birliyi Abşeron Telekommunikasiya Qovşağında yeni nəsil şəbəkələrinin (NGN) tətbiqi ilə bağlı təmir işləri aparır.
Hazırda Abşeron telefon şəbəkəsi 30 min 624 nömrədən ibarətdir. Rayonda gedən tikinti-quruculuq işləri, yeni yaşayış massivlərinin salınması telefona da tələbatı artırmışdır. Əhalinin tələbatını ödəmək üçün Sloveniyadan tutumu 48 min 700 nömrə olan müasir avadanlıq alınmış və onun sentyabrda quraşdırılması nəzərdə tutulmuşdur.
Yeni stansiyalar Hökməli kəndini, Qobu qəsəbəsini və Qobustan kəndini əhatə edəcəkdir. Rayonun 5 yaşayış məntəqəsində - Qobu, Yuxarı Güzdək, Aşağı Güzdək qəsəbələrində, Pirəkəşkül və Çaylı kəndlərində isə ilin sonunadək telefon xətləri fiber optik kabellə əvəz olunacaqdır. Yeni stansiyada qurulacaq müasir avadanlıq sayəsində bir xətlə telefon rabitəsi, genişzolaqlı internet xidməti, həm də AY-Pİ-TV və video telefon xidmətləri də göstəriləcəkdir.
Bölmənin digər xəbərləri
