ADA məzunu: Xaricdə təhsili məqsəd deyil, gələcək inkişaf üçün vasitə kimi qiymətləndirməlidirlər
Bakı, 11 avqust, AZƏRTAC
Azərbaycan Respublikasının Elm və Təhsil Nazirliyi ilə Çin Xalq Respublikasının Təhsil Nazirliyi arasında təhsil sahəsində əməkdaşlıq haqqında Saziş çərçivəsində 2026-2027-ci tədris ili üzrə 20 nəfər Azərbaycan vətəndaşı Çinin nüfuzlu ali təhsil müəssisələrində təhsil almaq imkanı qazanıb. Onlardan biri də ADA Universitetinin biznesin idarə edilməsi ixtisası üzrə məzunu Yunis Bayramlıdır.
Yunis Bayramlı AZƏRTAC-a müsahibəsində bildirib ki, ADA Universitetində biznesin idarə edilməsi ixtisası üzrə bakalavr təhsilini orta müvəffəqiyyət göstəricisi 90 bal olmaqla başa vurub. Universitetdaxili beynəlxalq mübadilə proqramının qalibi olaraq Fransada “Audencia Business School”da yarımillik təhsil alıb. Təhsil müddətində biznes analitikası, məlumatların təhlili və layihələrin idarə olunması sahələrinə maraq göstərən gənc məzun, eyni zamanda, “Azərkosmos”da biznesin inkişafı və kommersiya həlləri istiqamətində çalışaraq innovativ layihələr üzrə praktiki təcrübə qazanıb.
Müsahibimiz qeyd edib ki, Çin Hökumətlərarası Təqaüd Proqramı haqqında xaricdə təhsil imkanlarını araşdırarkən məlumat əldə edib. Bu proqram onun üçün yalnız maliyyə dəstəyi deyil, həm də dünyanın ən dinamik inkişaf edən ölkələrindən birində təhsil almaq və fərqli inkişaf modelini yaxından öyrənmək imkanı yaradıb: “Seçim prosesi kifayət qədər məsuliyyətli idi. Sənədlərin hazırlanması, universitet seçimi, tövsiyə məktubları və müsahibə mərhələləri ciddi hazırlıq tələb edirdi. Hər mərhələnin öz çətinliyi var idi. Mənim üçün ən çətin hissə isə nəticəni gözləmək oldu. Bu zaman ancaq səbirli olmaq lazımdır. Mən Çinin Çjetszyan Universitetində idarəetmə elmi və mühəndisliyi ixtisası üzrə magistratura təhsili alacağam. Bu proqramı seçməyimin əsas səbəbi idarəetmə, texnologiya və analitikanın bir araya gəldiyi müasir istiqamət olmasıdır. Universitetin müvafiq proqram çərçivəsində təklif etdiyi təhsil, eləcə də “Alibaba”, “Geely Auto” və “Hikvision” kimi qlobal şirkətlərin fəaliyyət göstərdiyi şəhərdə yerləşməsi seçimimdə mühüm rol oynadı. Çini seçməyimin əsas səbəbi bu ölkənin son onilliklərdə iqtisadiyyat, texnologiya və innovasiya sahələrində əldə etdiyi böyük uğurlardır. Fikrimcə, fərqli inkişaf modelini yerində öyrənmək həm peşəkar, həm də şəxsi inkişaf baxımından böyük üstünlükdür. Məqsədim yalnız akademik biliklər əldə etmək deyil, həm də qlobal düşüncə formalaşdırmaq və müxtəlif ölkələrdən olan insanlarla əməkdaşlıq təcrübəsi qazanmaqdır”.
Həmsöhbətimiz bildirib ki, Çində əldə edəcəyi bilik və təcrübənin Azərbaycanda idarəetmə, biznes analitikası, məlumat əsaslı qərarvermə və rəqəmsal transformasiya istiqamətlərinin inkişafına töhfə verəcəyinə inanır. Təhsil aldığı müddətdə əsas məqsədi müasir idarəetmə yanaşmalarını mənimsəmək, beynəlxalq akademik əlaqələr qurmaq və Azərbaycanın investisiya imkanlarının təşviqinə töhfə verməkdir. Yunis Bayramlı vurğulayıb ki, gələcəkdə idarəetmə, biznes analitikası və strateji inkişaf sahələrində fəaliyyət göstərmək, beynəlxalq təcrübədən istifadə etməklə Azərbaycanda innovasiya, rəqəmsallaşma və effektiv idarəetmə istiqamətlərində dəyər yaratmaq niyyətindədir.
Xaricdə təhsil almaq istəyən gənclərə tövsiyələrini də bölüşən Yunis Bayramlı qeyd edib ki, onlar ilk növbədə maraq göstərdikləri sahəni düzgün müəyyənləşdirməli, xaricdə təhsili məqsəd deyil, gələcək inkişaf üçün vasitə kimi qiymətləndirməlidirlər. Daim öyrənmək, sual vermək, yeniliklərə açıq olmaq və çətinliklər qarşısında ruhdan düşməmək uğura aparan əsas amillərdəndir.
Müxbir - Nərmin Muradzadə
Bölmənin digər xəbərləri
