ADSEA: Zabuxçay su anbarının tikintisi yekunlaşmaq üzrədir
Bakı, 29 aprel, AZƏRTAC
Səudiyyə Ərəbistanının “ACWA Power” şirkəti ilə dəniz suyunun duzsuzlaşdırılması layihəsi çərçivəsində Sumqayıt Sənaye Kimya Parkında günlük 300 min kubmetr içməli suyun istehsalı nəzərdə tutulan zavodun tikintisi 2,5 ilə planlaşdırılır.
AZƏRTAC xəbər verir ki, bu sözləri Azərbaycan Dövlət Su Ehtiyatları Agentliyinin (ADSEA) Elm və innovasiya sektorunun müdiri Əliağa Əzizov Milli Biznesin İnkişafı Forumunda çıxışı zamanı deyib.
O qeyd edib ki, ölkə ərazisində formalaşan su ehtiyatlarının təxminən 25 faizini təşkil edən Qarabağ və Şərqi Zəngəzurun su mənbələri ölkə üçün olduqca əhəmiyyətlidir.
“İşğal dövründə Qarabağ və Şərqi Zəngəzurun su mənbələri və ekosistemi daxil olmaqla ətraf mühit ciddi zərər görüb. Regionda su təchizatı və idarəetməsinin yaxşılaşdırılması məqsədilə bir sıra mühüm infrastruktur layihələri həyata keçirilib və hazırda davam etdirilir”, - deyə o qeyd edib.
O, həmçinin əlavə edib ki, Zabuxçay su anbarının tikintisi yekunlaşmaq üzrədir və Hacıqabul gölünün vəziyyətinin yaxşılaşdırılması planlaşdırılır.
Bölmənin digər xəbərləri
