AEM-in rəsmisi: Yalnız resept olmadan buraxılan dərman vasitələri reklam edilə bilər
Bakı, 4 noyabr, AZƏRTAC
“Dərman vasitələri haqqında” Qanunun 16-1-ci maddəsinə əsasən Azərbaycan Respublikasında yalnız resept olmadan buraxılan dərman vasitələri reklam edilə bilər.
AZƏRTAC xəbər verir ki, bunu Səhiyyə Nazirliyinin Analitik Ekspertiza Mərkəzinin (AEM) Hüquq şöbəsinin müdiri Tamam Həsənova açıqlayıb.
Onun sözlərinə görə, resept olmadan buraxılan dərman vasitələrinin reklamında bəzi hallar yolverilməzdir: “Belə ki, yetkinlik yaşına çatmayan şəxslərə müraciət etmək, reklam olunan dərman vasitəsinin istifadəsi nəticəsində insanın xəstəliklərdən sağalmasının, səhhətinin yaxşılaşmasının konkret hallarına istinad etmək, reklam olunan dərman vasitəsinin istifadəsi ilə bağlı fiziki şəxslərin minnətdarlığını ehtiva etmək, sağlam insanda reklam olunan dərman vasitəsinin istifadə edilməsinin zəruriliyi barədə təsəvvür yaratmağa yol verilmir. Bundan əlavə, həkimə müraciət etməyin gərəksiz olmağı barədə təsəvvür yaratmaq, reklam olunan dərman vasitəsinin müsbət təsirinə, təbii mənşəli olmasına, onun təhlükəsizliyinə, effektivliyinə və əlavə təsirlərin olmamasına təminat vermək, reklam olunan dərman vasitəsinin bioloji aktiv qida məhsulu qismində və ya dərman vasitəsi olmayan digər əmtəə (məhsul) qismində təqdim etmək qadağandır”.
Tamam Həsənova qeyd edib ki, tələblər tibb və ya əczaçılıqla bağlı sərgilər, seminarlar və konfranslar keçirilən yerlərdə yayımlanan reklama şamil edilmir: “Resept olmadan buraxılan dərman vasitələrinin qəbulu və tibbi texnikadan istifadə əlavə təsirlə müşayiət olunduqda, reklamda bu barədə məlumat verilməli, həkimlə yaxud mütəxəssislə məsləhətləşmənin zəruriliyi qeyd edilməlidir. Dərman vasitələrinin pulsuz paylanması, satışı, ödənişli və ya ödənişsiz tibbi xidmətlərin göstərilməsi ilə müşayiət olunan reklam aksiyalarının keçirilməsi qadağandır. İnzibati Xətalar Məcəlləsinin 428-ci maddəsinə əsasən, resept əsasında buraxılan dərman vasitələrinin reklamına görə vəzifəli şəxslər 300 manatdan 500 manatadək, hüquqi şəxslər 1000 manatdan 2000 manatadək məbləğdə cərimə edilirlər. Dərman vasitələrinin pulsuz paylanması, satışı, ödənişli və ya ödənişsiz tibbi xidmətlərin göstərilməsi ilə müşayiət olunan reklam aksiyalarının keçirilməsinə görə, fiziki şəxslər 300 manatdan 500 manatadək, vəzifəli şəxslər 800 manatdan 1000 manatadək, hüquqi şəxslər 1000 manatdan 2000 manatadək məbləğdə cərimə edilirlər”.
Şöbə müdiri vətəndaşlarda dərman vasitəsinin keyfiyyəti və ya mənşəyi barədə şübhə yarandığı təqdirdə, nəzarətedici qurum olan AEM-ə müraciət edə biləcəklərini vurğulayıb: “Nazirlər Kabinetinin 2019-cu il 25 dekabr tarixli Qərarı ilə təsdiq edilmiş “Dərman vasitələrinin ekspertizasının, o cümlədən sadələşdirilmiş ekspertizasının aparılması Qaydası”na əsasən, dərman vasitələrinin ekspertizası istehlakçıların hüquqlarının müdafiəsi məqsədilə qurum tərəfindən ödənişsiz aparılır. Vətəndaşlar dərmanı və qəbzi mərkəzin “Bir pəncərə” xidmətinə təqdim etməklə ekspertiza tələb edə bilərlər. Əvvəlcə dərman vasitəsinin dövlət qeydiyyatının olub-olmadığı müəyyən edilir, daha sonra laborator müayinəsi aparılır. Araşdırma yekunlaşdıqdan sonra “Vətəndaş müraciətləri haqqında” Qanunun tələbinə əsasən, vətəndaşa yazılı formada məlumat verilir. Əgər dərman vasitəsi dövlət qeydiyyatından keçməyibsə, vətəndaş bu barədə rəsmi qaydada məlumatlandırılır”.
Bölmənin digər xəbərləri
