Ağır atletika üzrə respublika çempionatının ikinci seçmə mərhələ yarışı keçiriləcək
Bakı, 27 mart, AZƏRTAC
Aprelin 1-də ağır atletika üzrə respublika çempionatının ikinci seçmə mərhələ yarışı başlayacaq. Aprelin 9-dək keçiriləcək yarışda Azərbaycanın bütün bölgələrini təmsil edən atletlər mübarizə aparacaqlar.
Azərbaycan Ağır Atletika Federasiyasından AZƏRTAC-a bildiriblər ki, yarışın keçirilməsində məqsəd regionlarda atletlərin hazırlıq səviyyəsinin yoxlanılması, ehtiyat qüvvənin nəzərdən keçirilməsi, güclü idmançıların seçilməsi, ağır atletikanın təbliği və inkişafı, idmançıların ustalıq səviyyəsinin artırılması və təkmilləşdirilməsidir.
Yarış Xırdalan, Lənkəran və Samux şəhərlərində keçiriləcək. Şəxsi xarakter daşıyan yarışda yalnız texniki cəhətdən hazırlıqlı, yaşı 10-dan yuxarı olan idmançılar iştirak edə bilərlər. Zona turnirində 1999-2007-ci il təvəllüdlü və daha yuxarı yaşlı kişilər və qadınlar müvafiq yaş qruplarında mübarizə aparacaqlar. Qaliblər Sinkleyr cədvəli üzrə müəyyən ediləcəklər.
Bölmənin digər xəbərləri
