Akademik: Elmi fəaliyyətin tətbiqi nəticələr verməsi və kommersiyalaşdırılması əsas şərtlərdən biridir
Bakı, 12 fevral, AZƏRTAC
Prezident İlham Əliyevin AMEA-nın 80 illik yubiley yığıncağındakı çıxışı Azərbaycan elmi üçün strateji yol xəritəsi və proqram xarakterli sənəd kimi qiymətləndirilə bilər. Dövlətimizin başçısının Akademiyanın yubiley tədbirində səsləndirdiyi fikirlər, eləcə də yerli televiziyalara verdiyi müsahibəsində toxunduğu məsələlər hər bir alim üçün olduqca ciddi çağırışlardır. Həmin çıxışlarda Azərbaycan tarixinin obyektiv təqdimatı, Azərbaycan dilinin qorunub saxlanılması, süni intellekt və rəqəmsallaşma kimi mühüm istiqamətlər xüsusi vurğulanıb.
AZƏRTAC xəbər verir ki, bu barədə Azərbaycan Milli Elmlər Akademiyası Gəncə Bölməsinin sədri, akademik Fuad Əliyev söyləyib. O qeyd edib ki, Azərbaycan Prezidenti AMEA-nın yubiley tədbirində çıxışı zamanı elmin, milli-mənəvi dəyərlərin, Azərbaycan dilinin və tarixi-mədəni irsin qorunması və təbliği istiqamətindəki rolunu xüsusi vurğulamaqla yanaşı, elmi tədqiqatların real nəticələrə xidmət etməsinin vacibliyini ön plana çəkib.
“Dövlətimizin başçısı, həmçinin vurğulayıb ki, elmi biliklər birbaşa cəmiyyətin rifahının yüksəldilməsinə, sosial-iqtisadi inkişafın sürətləndirilməsinə xidmət etməlidir. Bu çağırışlar xüsusilə regional elmi mərkəzlərin fəaliyyətinin yenidən strukturlaşdırılmasını, mövcud imkanlardan daha səmərəli istifadə olunmasını və səmərəli tədqiqatların aparılmasını zəruri edir”, - deyə alim bildirib.
Akademik vurğulayıb ki, AMEA-nın Gəncə bölməsində də dövlətimizin başçısının tarixi həqiqətlərin geniş ictimaiyyətə çatdırılması istiqamətində çağırışlarına uyğun olaraq uzun illərdir tədqiqatlar aparılır, eyni zamanda, maarifləndirmə işləri həyata keçirilir, məlumatlandırıcı materiallar hazırlanır. Bölmə əməkdaşları tərəfindən şəhərimizin məktəbliləri ilə mütəmadi olaraq görüşlər keçirilir, Azərbaycan xalqının müxtəlif vaxtlarda məruz qaldığı soyqırımlar və tarixi həqiqətlərlə bağlı bukletlər hazırlanaraq təhsil müəssisələrinə təqdim olunur. Həmin materiallar şagirdlərə paylanılır və onların tariximiz barədə düzgün və dolğun məlumatlar almasına xidmət edir. Bu fəaliyyət gənc nəslin tarixi yaddaşının formalaşdırılması və milli şüurun möhkəmləndirilməsi baxımından mühüm əhəmiyyət daşıyır.
“Ümumiyyətlə, təcrübə göstərir ki, elm, təhsil və istehsalat bir-birindən ayrı şəkildə fəaliyyət göstərdikdə gözlənilən nəticə əldə olunmur. Bu, yalnız yerli deyil, dünya təcrübəsində də öz təsdiqini tapmış bir yanaşmadır. Elmin dayanıqlı inkişafı üçün onun real maliyyə mənbələrinə söykənməsi vacibdir və bu baxımdan elmi fəaliyyətin tətbiqi nəticələr verməsi və kommersiyalaşdırılması əsas şərtlərdən biridir. Məhz elm–təhsil–istehsalat vəhdəti formalaşdığı, elmin istehsalata inteqrasiyasının təmin olunduğu təqdirdə elmi-innovativ inkişaf təmin olunur və elmin cəmiyyətə verdiyi fayda əhəmiyyətli dərəcədə artır”, - deyə alim bildirib.
Bölmənin digər xəbərləri
