Bakı, 25 noyabr, Pərvanə İmanova, AZƏRTAC

Noyabrın 25-də Azərbaycan Milli Elmlər Akademiyasında (AMEA) Memarlıq və İncəsənət İnstitutunun təşkilatçılığı ilə görkəmli memar, Sosialist Əməyi Qəhrəmanı, Dövlət mükafatları laureatı, akademik Mikayıl Hüseynovun 110 illik yubileyinə həsr olunan elmi sessiya keçirilib.

AZƏRTAC xəbər verir ki, tədbirdə AMEA-nın prezidenti, akademik Akif Əlizadə çıxış edərək görkəmli memarın zəngin fəaliyyətindən, milli memarlıq sənətimizə verdiyi töhfələrdən söz açıb.

Akademik A.Əlizadə tədbirin Prezident İlham Əliyevin “Akademik Mikayıl Hüseynovun 110 illik yubileyinin keçirilməsi haqqında” 2015-ci il 1 iyun tarixli Sərəncamına əsasən keçirildiyini söyləyib. Bildirilib ki, dünya şöhrətli memarın yubileyinin dövlət səviyyəsində qeyd olunması ölkə Prezidentinin elm xadimlərimizə və Azərbaycanın memarlıq sənətinə göstərdiyi diqqət və qayğının bariz nümunəsidir.

AMEA-nın rəhbəri qeyd edib ki, M.Hüseynov Azərbaycanın milli memarlıq ənənələrini yeni axtarışları ilə zənginləşdirib və müasir texnologiyalardan istifadə edərək monumental tikililərin qiymətli nümunələrini yaradıb. Azərbaycanda böyük memarlıq məktəbinin yaradıcısı olan akademik M.Hüseynovun təkcə ölkəmizdə deyil, onun hüdudlarından kənarda da müxtəlif abidələrin, sənət nümunələrinin ərsəyə gəlməsində böyük əməyi olub. Azərbaycan memarlığının elm kimi təşəkkülündə xüsusi rolu olan alimin yüksək ixtisaslı kadrların hazırlanmasında mühüm xidmətləri vardır. Onun layihələri əsasında Bakıda, Gəncədə, Naxçıvanda, Şəkidə, eləcə də Düşənbədə, Moskvada və digər şəhərlərdə mədəni-məişət binaları tikilib. M.Hüseynov əzəmətli yaşayış və ictimai binaların layihələrini hazırlayıb.

Akademik A.Əlizadə bildirib ki, İngiltərə kraliçası II Yelizavetanın himayəsi altında olan “Böyük Britaniya Asiya cəmiyyəti” tərəfindən 1985-ci ildə təşkil edilən “Bakının memarlığı” sərgisində M.Hüseynovun əsərləri nümayiş etdirilib. Sərgi materiallarına keçirilən baxış və müzakirələrdən sonra azərbaycanlı memar Böyük Britaniya və İrlandiya Krallığının Asiya cəmiyyətinin fəxri üzvü seçilib. Elə buradaca onun yeni Azərbaycan memarlığı məktəbini yaratdığı da qeyd edilib.

Vurğulanıb ki, M.Hüseynovun elmi irsi gənc memarlar üçün örnəkdir.

Azərbaycan Memarlar İttifaqı idarə heyətinin sədri Elbay Qasımzadə M.Hüseynovu XX əsr Azərbaycan memarlığının ən parlaq nümayəndəsi kimi səciyyələndirib. Qeyd edilib ki, M.Hüseynov gənclik illərindən memarlığa həvəs göstərib və bu məhəbbətə ömrü boyu sadiq qalıb. Görkəmli memar 200-dən çox layihə yaradıb və bunların hamısı çox peşəkarcasına, yüksək səviyyədə həyata keçirilib. Görkəmli alimin elmi irsi gənc memarlar üçün böyük tədqiqat mövzusudur. M.Hüseynov əsərlərində memarlıq sənətinin irsindən çox ustalıqla istifadə edib və onun yaradıcılığında heç bir əcnəbi memarlıq nümunələrə rast gəlinmir. Uzun illər Azərbaycan Memarlar İttifaqına rəhbərlik edən M.Hüseynov həm də ictimai xadim kimi fəaliyyət göstərib.

Akademik Ömər Eldarov dünya şöhrətli memar, alim, pedaqoq, akademik M.Hüseynovun Azərbaycan memarlığının inkişafındakı xidmətlərindən, yüksək insani keyfiyyətlərindən danışıb.

Tədbirdə “Akademik M.Hüseynov və Azərbaycanda sənətşünaslıq məktəbi”, “Akademik M.Hüseynovun yaradıcılıq yolunun mərhələləri”, “M.Hüseynovun tikililəri memarlıq abidələridir” və digər mövzularda məruzələr dinlənilib.