Akademik Zərifə Əliyevanın apardığı tədqiqatlar Azərbaycan tibb elminin parlaq səhifəsidir
Yevlax, 27 aprel, AZƏRTAC
Yevlax Şəhər İcra Hakimiyyəti və Yevlax Rayon Mərkəzi Xəstəxanasının birgə təşkilatçılığı ilə görkəmli oftalmoloq, Əməkdar elm xadimi, tibb elmləri doktoru, Azərbaycan Milli Elmlər Akademiyasının akademiki Zərifə Əziz qızı Əliyevanın anadan olmasının 100-cü ildönümünə həsr olunmuş konfrans keçirilib.
AZƏRTAC-ın bölgə müxbiri xəbər verir ki, Yevlax Şəhər İcra Hakimiyyətinin, YAP rayon təşkilatının, Yevlax Şəhər Xəstəxanası Publik Hüquqi şəxsin, Ağsaqqallar Şurasının, hüquq-mühafizə orqanları rəhbərlərinin, Milli Məclisin deputatlarının, tibb işçilərinin iştirak etdiyi tədbirdə Azərbaycanın Dövlət Himni səsləndirilib, Ulu Öndər Heydər Əliyevin, akademik Zərifə xanım Əliyevanın, Azərbaycanın ərazi bütövlüyü uğrunda canlarını qurban vermiş şəhidlərimizin xatirəsi bir dəqiqəlik sükutla yad edilib.
Tədbirdə çıxış edən Yevlax Şəhər İcra Hakimiyyətinin başçısı Anar Tağıyev bildirib ki, Prezident, Müzəffər Ali Baş Komandan İlham Əliyevin 2022-ci il 3 noyabr tarixli Sərəncamına əsasən akademik Zərifə xanım Əliyevanın 100 illik yubileyi ölkəmizdə geniş qeyd edilir. Zərifə xanımın timsalında biz qadının zərifliyi ilə qüdrətinin birləşməsinin, Azərbaycan qadınlarının ən yaxşı keyfiyyətlərinin unikal vəhdətini görürük. O, həm də xalqımızın milli-mənəvi dəyərlərinin zənginləşməsinə özünün əvəzsiz töhfələrini verib. Azərbaycanın tanınmış simalarından olan, tibb tariximizdə silinməz iz qoymuş Zərifə xanım Əliyevaya əbədiyaşarlıq qazandıran onun nəcib niyyəti, xeyirxah əməlləri, Vətən naminə gördüyü böyük işləridir. Qayğıkeş həkim Zərifə xanım Əliyevanın həyat yolu nümunə göstərilə biləcək qədər mənalı, zəngin olub. Qaranlıq gözlərə nur paylayan, oftalmologiya elmində xüsusi dəst-xəti ilə iz qoyan akademik əməlləri ilə əbədiyaşarlıq qazanmışdır.
Qeyd edilib ki, Zərifə xanım Əliyeva qayğıkeş ana, vəfalı ömür-gün yoldaşı, işini mükəmməl bilən həkim idi. O, Ümummilli Lider Heydər Əliyevin həyat yoldaşı, iki əsrlik münaqişəni və 30 illik savaşı cəmi 44 günə Zəfərlə bitirən, dünya miqyaslı siyasi lider olan, tarixin ən qüdrətli Azərbaycanını yaratmış Müzəffər Ali Baş Komandanı böyütmüş fədakar, qayğıkeş ana idi. Onun ömür yolu elmi fəaliyyəti uğurlarla zəngindir. Zərifə xanıma həmkarlarının, yetirmələrinin, xəstələrinin hörmət və məhəbbətini qazandıran onun həkim fədakarlığı, yüksək vətəndaşlıq mövqeyi, səmimiyyəti, insanlara qayğısı idi. Onun keçdiyi şərəfli həyat yolu hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik məktəbidir. Onun zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifəsidir.
Diqqətə çatdırılıb ki, Prezident, Müzəffər Ali Baş Komandan İlham Əliyevin müvafiq Sərəncamına əsasən, ölkəmizdə 2023-cü il Ümummilli Lider Heydər Əliyevin anadan olmasının 100 illiyi münasibətilə “Heydər Əliyev İli” elan edilib. Zərifə xanımın 100 illiyi onun taleyi ilə birbaşa bağlı olan ömür-gün yoldaşının 100 illiyinə həsr edilmiş ildə qeyd olunur. Həm Ulu Öndərimizin, həm də görkəmli alim Zərifə xanımın 100 illik yubileylərinin ölkəmizdə təntənəli surətdə qeyd olunması bir daha onu deməyə əsas verir ki, xalqımız Heydər Əliyev və Zərifə Əliyevanın simasında mənəviyyat tariximizi örnək kimi nəsildən-nəslə ötürür.
Konfransda çıxış edən YAP Yevlax rayon təşkilatının sədri Rafiq Əliyev, Milli Məclisin deputatları İlham Məmmədov, Müşfiq Məmmədli, Yevlax Şəhər Xəstəxanası Publik Hüquqi şəxsin direktoru Fazil İsmayılov və başqaları vurğulayıblar ki, Zərifə xanım Əliyeva hər şeydən əvvəl Azərbaycan dövlətinə, xalqına xidmət edən gözəl bir nəslin nümayəndəsidir. O, həkimlik peşəsini, xüsusilə oftalmologiya sahəsini seçərək insanlara nur bəxş edib, onlara həyatın bütün rəng çalarlarını görməsində kömək edib, ən əsası bu sahədə qabaqlayıcı tədbirlərin istiqamətlərini müəyyənləşdirib. Görmə orqanının texnologiyası məsələsini müzakirəyə gətirmək və bu istiqamətdə dünyada ilk dəfə elmi-tədqiqat laboratoriyasını yaratmaq kimi addımlar atması onu göstərirdi ki, görkəmli alim öz missiyasını nə dərəcədə geniş çərçivədə götürüb. Zərifə xanım Əliyevanın dünyanın dahi şəxsiyyətləri içərisində özünəməxsus yeri olan Ulu Öndər Heydər Əliyevin həyat yoldaşı olması və onun həyatının bütün məqamlarında yanında olması, dayaq, güvən yeri kimi çıxış etməsi də Ümummilli Liderin həm siyasət, dövlət həyatında, həm də qarşıya qoyduğu bütün məqsədlərə çatmasında böyük dəstək olub.
Çıxışlarda Zərifə xanım Əliyevanın Azərbaycanda oftalmologiya elminin inkişafındakı xidmətlərindən, bu sahədəki tədqiqatlarından, keçdiyi şərəfli ömür yolundan, sədaqətli həyat yoldaşı və qayğıkeş, ölkəmizin sürətli inkişafını təmin edən, zəfərlərdən-zəfərlərə aparan oğul yetişdirən ana olmasından bəhs edilib.
Konfransda akademik Zərifə xanım Əliyevaya həsr olunmuş videoçarx nümayiş olunub.
Sonda Yevlax Mədəniyyət Mərkəzinin əməkdaşları Zərifə xanımın Əliyevanın əziz xatirəsinə həsr olunmuş musiqi nömrələri ifa ediblər.
Bölmənin digər xəbərləri
