Belqrad, 18 sentyabr, AZƏRTAC

Serbiya Prezidenti Aleksandar Vuçiç paytaxt Belqradda Müqəddəs Taxt-Tacın dövlət katibi kardinal Pietro Parolin ilə görüşüb.

AZƏRTAC xəbər verir ki, görüşdə Serbiya ilə Müqəddəs Taxt-Tac arasında bütün səviyyələrdə siyasi dialoqun davam etdirilməsinin əhəmiyyəti qeyd olunub. Həmçinin Serbiyanın dini və mədəni irsinin qorunması və bərpası məsələləri müzakirə edilib.

Aleksandar Vuçiç qeyd edib ki, Serbiyanın Roma Katolik Kilsəsi ilə əməkdaşlığı yaxşıdır, bu münasibətlər qarşılıqlı hörmətə əsaslanır.

O vurğulayıb ki, ölkəsi Müqəddəs Taxt-Tacın Serbiyanın ərazi bütövlüyü ilə bağlı prinsipial və beynəlxalq hüquqa, hörmətə əsaslanan mövqeyini yüksək qiymətləndirir.

Nihad Budaqov

AZƏRTAC-ın xüsusi müxbiri

Belqrad