Aleksandr Kovalenko: Rusiya və Ukrayna güzəştə getməyə hazır deyil
Kiyev, 19 fevral, AZƏRTAC
Bugünkü vəziyyətdə Ukrayna və Rusiya tərəfləri arasında atəşkəsə dair müəyyənləşmiş şərtlər yoxdur. Bu şərtlər adətən hamının başa düşdüyü çərçivəyə hədəflənməlidir. Məsələn, buraya danışıqlar prosesi daxildir. Danışıqlar prosesi isə cəbhədə döyüşlər dayanmadan mümkünsüzdür.
Bu fikri AZƏRTAC-a açıqlamasında ukraynalı ekspert Aleksandr Kovalenko söyləyib. Onun sözlərinə görə, atəş kəsilmədən hər hansı danışığın, görüşün, telefon zənginin effekti olmur.
“İndiki vəziyyətdə görürük ki, Rusiya Ukraynaya qarşı münasibətdə hər hansı güzəştə getməyə hazır deyil. Rusiya ilk addım olaraq döyüşü dayandırlmalıdır. Öz növbəsində, Ukrayna da hər hansı güzəştə getməyə hazır deyil. Ukraynanın ilk növbədə şərti budur ki, ən azından Rusiya öz ordusunu 2022-ci il fevralın 23-ü vəziyyətinə olan ərazilərinə qaytarmalıdır. Bu şərti Ukrayna Prezidenti də səsləndirib. Daha bir şərt isə Ukraynanın Zaporojye Atom Elektrik Stansiyasına nəzarəti bərpa etməsidir. Əgər bu baş verərsə, deməli, Ukrayna Xerson və Zaporojyenin itirilmiş ərazilərinə tam nəzarəti bərpa edəcək. Bunlar danışıqların başlanması üçün ilkin şərtlərdir. Bu şərtlərə isə Rusiyanın könüllü gedəcəyi real görünmür”, - deyə Aleksandr Kovalenko əlavə edib.
Ukraynalı ekspert Ər-Riyadda ABŞ və Rusiya rəsmilərinin danışıqlarına münasibət bildirərkən qeyd edib ki, ABŞ Ukrayna və Avropaya qarşı heç vaxt cəbhə açmayacaq.
“Bu, reallıqdan uzaqdır. İndi ABŞ üçün əsas hədəf Çin ilə iqtisadi müharibədir. Ukrayna-Rusiya müharibəsi isə Donald Tramp üçün ikinci dərəcəli məsələdir. Tramp məhz Ukrayna-Rusiya müharibəsi vasitəsilə Çinə təsir etmək istəyir. O, geopolitik səhnədə öz nüfuzunu artırmağa çalışır. Biz başa düşməliyik ki, Tramp üçün əsas prioritet Çinə qarşı iqtisadi mübarizədir. Tramp məhz Çinə qarşı iqtisadi müharibə üçün Ukrayna-Rusiya müharibəsinin tezliklə həllinə çalışır. Qalanları ikinci dərəcəlidir. Çin bunları yaxşı görür və təhlil edir. Çin bu vəziyyətdən məharətlə istifadə edərək müdafiə gücünü artıracaq”, - deyə Aleksandr Kovalenko vurğulayıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
