Alimlərin fikrincə, İtaliyada koronavirus ötən ilin dekabrından mövcud olub
Bakı, 19 iyun, AZƏRTAC
Ötən il İtaliyanın Milan və Turin şəhərlərinin kanalizasiya sularından götürülən nümunələrdə COVID-19 infeksiyasının izləri tapılıb.
AZƏRTAC “The Guardian” nəşrinə istinadla xəbər verir ki, bu barədə İtaliya Milli Səhiyyə İnstitutunun məlumatında deyilir.
“İki müxtəlif metoddan istifadə olunmaqla, iki müxtəlif laboratoriyada 2019-cu il dekabrın 19-da Milan və Turin, və 2020-ci il yanvarın 29-da Bolonya şəhərlərinin kanalizasiya sularından götürülən nümunələrdə SARS-COV-2 virusunun olduğu təsdiqlənib”, - deyə İtaliyanın Ətraf Mühit və Səhiyyə Departamentinin nümayəndəsi Cüzeppina La Rossa bildirib. Onun sözlərinə görə, yanvar və fevralda götürülən nümunələrdə də koronavirus izlərinə rast gəlinib. Lakin ötən ilin oktyabr və noyabr aylarının nümunələrində COVID-19 müşahidə olunmayıb.
İtaliyada koronavirusa ilk yoluxma halları fevralın əvvəlində Lombardiya regionunda aşkarlanıb. Sonra infeksiya Veneto, Emiliya-Romanya, Latsio və Pyemont vilayətlərinə yayılıb.
Pandemiyanın statistikasını aparan Worldometer saytının Bakı vaxtı ilə bu gün saat 15:20-yə olan məlumatına əsasən, dünyada 8,6 milyondan çox yoluxma və 456 min 943 ölüm faktı qeydə alınıb, 4 milyon 557 min 804 xəstə isə sağalıb.
İtaliyada indiyədək 238 min 159 nəfər koronavirus infeksiyasına yoluxub, 34 min 514 nəfər həyatını itirib. Hazırda 23 min koronavirus xəstəsinin müalicəsi davam etdirilir.
Bölmənin digər xəbərləri
