Alman ekoloqlar yeni pilot layihəsi üzərində işə başlayıblar
Berlin, 10 iyun, AZƏRTAC
Almaniyanın paytaxtındakı ekologiya fəalları bu günlərdə yeni pilot layihəsinə start veriblər.
AZƏRTAC xəbər verir ki, şəhər təbiətinin gənc keşikçiləri Berlində vəhşi heyvanları müşahidə etməyə başlayıblar. Layihədə hələlik iyirmiyə yaxın könüllü müşahidəçi çalışır. Onlar mütəmadi olaraq kameralarla ərazini gəzir, vəhşi heyvanların davranışını və miqrasiyasını qeydə alırlar.
Könüllülər həm də qayda-qanuna necə riayət olunduğunu izləyirlər. Məsələn, zibil qabları dolu olduqda bu barədə şəhərin müvafiq xidmətlərinə məlumat verirlər, çünki heyvanlar qida axtara-axtara zibil qablarına girə bilərlər. Reyncerlər həm də əhalini məlumatlandırmaqla məşğul olur. Məsələn, əgər sakinlərdən kimsə qu quşunu çörəklə yemləyirsə, könüllülər həmin şəxsə izah edirlər ki, su quşlarının qidalanması sisteminə müdaxilə etmək olmaz. Bu əmələ görə, həmin şəxsi 1000 avro cərimə gözləyir.
Heyvanlar çətin vəziyyətə düşdükdə xüsusi xidmət nümayəndələri gələnə qədər könüllülər həmin heyvanları xilas etməlidirlər.
Qeyd etmək lazımdır ki, vəhşi heyvanların böyük şəhərlərə üz tutması zərurət üzündən baş verir. Kənd təsərrüfatında pestisidlərdən istifadə edilməsinə görə heyvanların qidalanma sistemi pozulur və onlar şəhərlərə üz tuturlar. Almaniya KİV-lərində yayılmış məlumata görə, ötən bazar günü bir dəstə qaban meşədən yola çıxıb, nəticədə həmin yolda skuter sürən gənc xəsarət alaraq xəstəxanaya düşüb.
Hesablamalara görə, hər il 20 minə yaxın heyvan qida axtara-axtara Berlinə üz tutur.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
