ALMANİYA İMMİQRASİYA QAYDALARINI SƏRTLƏŞDİRİR
AZƏRTAC-ın müxbiri Berlindən xəbər verir ki, Xarici Vətəndaşların İşləri üzrə İdarə Almaniyada daimi yaşayan, habelə gələcəkdə bu ölkədə sığınacaq almaq, yaşamaq və ölkənin ictimai həyatına inteqrasiya olunmaq istəyən bütün əcnəbiləri ciddi sınağa çəkmək qərarına gəlmişdir. Federal İdarənin immiqrantlar qarşısında qoyduğu şərtlərdən və tələblərdən ən əsası və başlıcası bundan ibarətdir: Almaniyada məskunlaşıb uzun müddət yaşayan və sığınacaq almaq və ölkənin ictimai həyatına inteqrasiya olunmaq məqsədi ilə bu ölkəyə gələnlər, ilk növbədə, dövlətin dilini ən azı, adi ünsiyyət səviyyəsində bilməlidir. Əks təqdirdə, gəlmələrə yaşayış icazəsi verilməyəcəkdir. Almaniyada çoxdan məskunlaşmış, lakin ölkənin dilini lazımi ünsiyyət səviyyəsində bilməyən immiqrantları da ciddi sınaq gözləyir. İdarə belə gəlmələri əvvəlcə “inteqrasiya məqsədli dil öyrənmə kursları”na cəlb etmək niyyətindədir. Kurslara getmək və dil öyrənməkdən imtina edənləri, habelə kurslara getdikdən sonra sınaqdan çıxmayanları işsizliyə görə yardım və sosial maliyyə təminatından məhrum olmaq, hətta ölkədə qalmaq icazəsinin müddətinin bir daha uzadılmaması təhlükəsi gözləyəcəkdir.
