Almaniya Polşanın hava məkanının gücləndirilməsində iştirakını artırır
Berlin, 11 sentyabr, AZƏRTAC
Rusiyaya məxsus dronların Polşanın hava məkanını pozmasına cavab olaraq, Almaniya NATO-nun şərq sərhədinin müdafiəsində iştirakını gücləndirir.
AZƏRTAC “Bild” qəzetinə istinadla xəbər verir ki, bu barədə hökumət sözçüsü Stefan Kornelius məlumat verib. O bildirib ki, Almaniyanın qırıcı təyyarələri ilə Polşa üzərində hava məkanına nəzarət genişləndiriləcək.
Hazırda Bundesver Polşa üzərində nəzarət əməliyyatına Rostok-Laaqe bazasında yerləşdirilmiş iki “Eurofighter” qırıcısı ilə qatılır. Müdafiə Nazirliyi bu sayın dördə çatdırılacağını açıqlayıb. Həmçinin sentyabrın 30-dək planlaşdırılan missiya dekabrın 31-dək uzadılacaq.
Almaniyanın Ukraynaya dəstəyini də gücləndirəcəyini bildirən S.Kornelius bununla bağlı detalları açıqlamayıb. O, Almaniyanın Avropa İttifaqında Rusiyaya təzyiqi artırmaq üçün “güclü 19-cu sanksiyalar paketi”nin daha tez qəbul edilməsinə çalışacağını qeyd edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
