Almaniya Prezidenti son 27 ildə ilk dəfə Böyük Britaniyaya dövlət səfəri edəcək
London, 13 oktyabr, AZƏRTAC
Almaniya Prezidenti Frank-Valter Ştaynmayer həyat yoldaşı Elke Büdenbenderlə birlikdə Böyük Britaniya Kralı III Çarlzın dəvəti ilə dekabrın 3-dən 5-dək bu ölkəyə dövlət səfəri edəcək.
AZƏRTAC xəbər verir ki, Kral III Çarlz və Kraliça Kamilla dövlət səfərinə Vindzor qalasında ev sahibliyi edəcəklər.
Xatırladaq ki, onlar 2023-cü ildə Almaniyaya dövlət səfəri etmişdilər. Bu, Kralın taxta çıxmasından sonra ilk xarici dövlət səfəri olmuşdu. Kral taxta çıxmazdan əvvəl, Uels şahzadəsi kimi Almaniyaya 40-dan çox səfər edib.
Prezident Frank-Valter Ştaynmayer həm xarici işlər naziri, həm də dövlət başçısı kimi Böyük Britaniyada bir neçə dəfə səfərdə olub. O, sonuncu dəfə 2023-cü ilin mayında Kral III Çarlz və Kraliça Kamillanın tacqoyma mərasimində iştirak edib. Bu, Almaniya Prezidenti tərəfindən son 27 ildə Böyük Britaniyaya edilən ilk dövlət səfəri olmaqla, həm də 1958-ci ildən bəri sayca beşincidir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
