Almaniya qəzeti Türkiyənin Ermənistandan keçən nəqliyyat dəhlizinə nail olmaq istədiyini qeyd edir
Berlin, 16 dekabr, AZƏRTAC
Almaniyanın “Frankfurter Allgemeine Zeitung” qəzetində Rayner Hermanın müəllifliyi ilə “Türkiyə Ermənistandan keçən nəqliyyat dəhlizinə nail olmaq istəyir” başlıqlı məqalə dərc olunub.
AZƏRTAC xəbər verir ki, məqalədə Türkiyə və Ermənistanın uzun illər soyuq münasibətlərdən sonra yenidən bir-biri ilə ünsiyyət qurmaq qərarına gəldikləri qeyd olunur. Bildirilir ki, tərəflər çətin ikitərəfli münasibətlərinin normallaşması istiqamətində artıq ilkin addımlarını atıblar. Belə ki, dekabrın 13-də Türkiyənin xarici işlər naziri Mövlud Çavuşoğlu Ermənistanla danışıqlar üçün xüsusi nümayəndə təyin olunduğunu, habelə İstanbulla İrəvan arasında çarter reyslərinin bərpa edildiyini açıqlayıb. Növbəti gün Ermənistanın Xarici İşlər Nazirliyinin sözçüsü də Türkiyə ilə dialoq üçün xüsusi nümayəndənin təyin edildiyini, eləcə də ölkəsinin “Türkiyə ilə münasibətlərin normallaşmasına hazır olduğunu” ifadə edib. Məqalədə, həmçinin vurğulanır ki, cari il oktyabr ayının 26-da Türkiyə Prezidenti Rəcəb Tayyib Ərdoğan Azərbaycanın azad etdiyi Füzuliyə səfəri zamanı bildirib ki, Ermənistanın Azərbaycanla olan problemlərini həll edəcəyi təqdirdə Türkiyə ilə Ermənistan arasında münasibətlərin normallaşmasına heç bir maneə qalmayacaq. Qeyd olunur ki, 44 günlük müharibənin ildönümündə Türkiyənin milli müdafiə naziri Hulusi Akar Ermənistandan Ankara və Bakının sülhməramlı jestlərinə qarşılıq verməyi tələb edib. Məqalədə diqqətə çatdırılır ki, sözügedən müharibə zamanı Azərbaycan Ordusu Türkiyə və İsrail istehsalı olan pilotsuz uçuş aparatlarının dəstəyi ilə, əsasən ermənilərin məskunlaşdığı, lakin beynəlxalq hüquqa görə Azərbaycanın tərkib hissəsi sayılan Qarabağ bölgəsinin böyük bir hissəsini azad edib.
Məqalədə bildirilir ki, sözügedən dəhliz barədə planların cari ilin oktyabr ayında İranın Azərbaycanla sərhəddə keçirdiyi hərbi təlimlərin əsas səbəbi olması ehtimal edilir. Belə ki, İran Ermənistanla olan yaxşı münasibətlərinə, o cümlədən sıx ticarət əlaqələrinə görə narahatdır. İranın Azərbaycanla olan münasibətləri isə İsrailin bu ölkədəki mövcudiyyətinə, eləcə də tərəflərin sıx hərbi əməkdaşlığına görə yaxşı deyil. Məqalədə diqqətə çatdırılır ki, indiyə qədər Türkiyə ilə Ermənistan arasında sərhədin bağlanmasından faydalanan Gürcüstan da Zəngəzur dəhlizinin yaradılmasından uduzan tərəflərdən biri olacaq.
Məqalədə Türkiyə və Ermənistan arasında baş tutacaq danışıqlarda məhz Zəngəzur dəhlizinin statusunun müzakirə olunacağı qeyd edilir. Əlavə olunur ki, Ermənistan öz suverenliyini güzəştə getməməkdə israr edir. İki dövlət bundan başqa 1915-ci ildə baş vermiş “erməni soyqırımı” ilə bağlı məsələni də nizama salmalıdır. Belə ki, Ankara “soyqırımı”nı tanımaqdan imtina edir.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
