Almaniya üçün Alternativ partiyasında ianə qalmaqalı baş verib
Berlin, 19 fevral, AZƏRTAC
Almaniyada keçiriləcək federal parlament seçkilərindən bir neçə gün əvvəl Almaniya üçün Alternativ (AfD) partiyası ilə bağlı yeni ianə qalmaqalı ortaya çıxıb.
AZƏRTAC xəbər verir ki, belə bir iddia ilə “Spiegel” və Avstriyada yayımlanan “Standard” nəşrləri çıxış edib. Qəzetlərin məlumatına görə, partiya 2,35 milyon avro məbləğində qanunsuz ianə qəbul edib.
İddiaya əsasən bu vəsait Avstriyanın keçmiş FPÖ siyasətçisindən deyil, alman milyarderi Henninq Konle tərəfindən ödənilib. Araşdırmalara görə, FPÖ-nün keçmiş siyasətçisi Gerhard Dinqler sadəcə vasitəçi olub.
Bununla bağlı həm Almaniya Federal Cinayət Polisi (BKA), həm də Avstriya təhlükəsizlik xidməti (DSN) çirkli pulların yuyulması şübhəsi ilə araşdırmalar aparır.
AfD rəhbərliyi isə vasitəçidən xəbərsiz olduqlarını bildirir. Əgər iddialar təsdiqlənərsə, partiya 7 milyon avro cərimələnə bilər.
Almaniyada müvafiq qanunlara görə, ianə edən şəxsin əsl kimliyini gizlətmək üçün edilən “vasitəçi ianələri” qadağandır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
