Almaniya Ukraynaya hava hücumundan müdafiə silahları verməyi vəd edib
Berlin, 9 sentyabr, AZƏRTAC
Ukrayna Müdafiə Kontakt Qrupunun (UDCG) üzvləri Ukraynaya hərbi yardımın artırılması və ölkənin qarşıdakı qışa hazırlanmasını müzakirə ediblər.
AZƏRTAC xəbər verir ki, Almaniya Müdafiə Nazirliyinin məlumatında görüşdə əsas diqqətin Ukraynanın hava hücumundan müdafiəsinin gücləndirilməsinə və 2026-cı il üzrə yardımın əlaqələndirilməsinə yönəldiyi bildirilib.
Almaniyanın müdafiə naziri Boris Pistorius ölkəsinin Ukraynanın ən güclü dəstəkçisi olduğunu vurğulayaraq, dəstəyin əsas prioritetlərindən birinin Ukraynanın hava hücumundan müdafiəsinin gücləndirilməsi olduğunu deyib. O bildirib ki, Almaniya bundan sonra da Ukraynaya əhəmiyyətli əlavə yardım göstərəcək.
Bu yardıma NATO-nun Ankara Sammitində artıq elan edilmiş “Patriot” hava hücumundan müdafiə sistemi üçün təcili ehtiyac duyulan “PAC-2 “idarəolunan raketləri, həmçinin Bundesverin ehtiyatlarından AIM-9L “Sidewinder” hava-hava raketlərinin əlavə tədarükü daxildir. Dəstək tədbirləri Ukraynanın şəhərləri üzərində qoruyucu hava müdafiə çətirinin yaradılmasını nəzərdə tutan “Şəhər Qübbə” layihəsini də əhatə edir.
Almaniya və Böyük Britaniya, həmçinin Ukraynaya on minlərlə uzaqmənzilli artilleriya sursatının çatdırılması üzrə birgə layihə həyata keçirəcək. Maliyyələşməni Almaniya, tədarük və çatdırılmanı isə Böyük Britaniya təmin edəcək.
Görüşdə Ukraynanın müdafiə naziri Yevgeni Xmara ölkənin hava hücumundan müdafiə vasitələrinə təcili ehtiyacının olduğunu bildirib və tərəfdaş ölkələri mövcud ehtiyatlarından sürətli yardım göstərməyə çağırıb.
NATO-nun Baş katibi Mark Rutte də Ukraynaya daha çox dəstək göstərilməsinə çağırıb və gecikmələrin insan həyatına başa gəldiyini vurğulayıb.
Ukrayna Prezidenti Volodimir Zelenski də Almaniyanın qərarını alqışlayıb. O, X sosial şəbəkəsində yazıb ki, Almaniyanın “Patriot” sistemləri üçün raketlər verməyə hazır olması hava hücumundan müdafiə sahəsində tərəfdaşlarla atılan mühüm addımdır. V.Zelenski bu cür qərarların insan həyatının məhv edilməsi imkanlarını azaltdığını və sülhü yaxınlaşdırdığını bildirib.
Qeyd edək ki, videokonfrans formatında keçirilən görüş UDCG-nin bu formatda 36-cı, Almaniya və Böyük Britaniyanın birgə rəhbərliyi ilə isə 10-cu toplantısı olub.
Bölmənin digər xəbərləri
