Almaniyada AfD-li siyasətçinin sabiq köməkçisi casusluqda ittiham olunur
Berlin, 29 aprel, AZƏRTAC
Almaniyada ifrat sağçı Almaniya üçün Alternativ (AfD) partiyasından Avropa Parlamenti üzvü Maksimilian Krahın sabiq köməkçisi Cian G. və Çin vətəndaşı Yaqi X. Çin kəşfiyyatına casusluq ittihamı ilə məsuliyyətə cəlb olunublar.
AZƏRTAC “Tagesschau” xəbər xidmətinə istinadla bildirir ki, Federal Baş Prokurorluğun məlumatına əsasən, Cian G-nin Avropa Parlamentindəki danışıqlar və qərarlar barədə məlumatları ötürdüyü və Çin müxalifətini izlədiyi iddia olunur. Onun 2002-ci ildən Çin kəşfiyyatı ilə əməkdaşlıq etdiyi bildirilir.
İstintaq zamanı Cian G-nin 500-dən çox sənəd əldə etdiyi və bunlardan bəzilərinin məxfi məlumatlar olduğu vurğulanır. Eyni zamanda, ona M.Krah da daxil olmaqla AfD-nin rəhbər şəxsləri ilə bağlı məlumat toplamaq ittihamı da irəli sürülüb.
Cian G. 2024-cü ilin aprelində Drezdendə həbs olunub. Onunla əlaqəsi olmaqda şübhəli bilinən və Leytsiq-Halle hava limanında çalışan Yaqi X. isə Almaniyadakı silah daşımaları barədə məlumatları ötürməkdə ittiham olunur.
Məsələ ilə bağlı açıqlama verən M.Krah bu hadisələrdən əvvəlcədən xəbərdar olunmadığını və özünü “qurban” hesab etdiyini bildirib.
Hazırda hər iki şəxs istintaq təcridxanasındadır. Ölkədə dövlətin təhlükəsizlik strukturlarına sızmaların qarşısının alınması üçün daha sərt yoxlamaların tətbiqi planlaşdırılır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
