Almaniyada federal seçkilərdə Kansler vəzifəsinə namizədlər teledebatda iştirak ediblər
Berlin, 17 fevral, AZƏRTAC
Almaniyada keçiriləcək növbədənkənar parlament seçkilərinə bir həftə qalmış Kansler vəzifəsinə namizədlər – Sosial Demokrat Partiyasının (SPD) namizədi, hazırkı Kansler Olaf Şolts, Xristian Birlik (CDU/CSU) partiyalarının namizədi Fridrix Merts, Yaşıllar partiyasının namizədi, hazırkı vitse-kansler Robert Habek və ifrat sağçı Almaniya üçün Alternativ partiyasının (AfD) namizədi Alis Vaydel arasında teledebat təşkil olunub.
AZƏRTAC xəbər verir ki, teledebatda əsasən miqrasiya siyasəti, təhlükəsizlik, xarici siyasət, iqtisadiyyat və digər mövzular diqqət mərkəzində saxlanılıb.
Teledebatda Olaf Şolts iqtisadi və sosial mövzuları xüsusilə diqqət mərkəzində saxlayaraq, minimum əməkhaqqı, ədalətli vergi sistemi və sabit pensiya səviyyəsi məsələlərinə yer verib. Alis Vaydel daha çox miqrasiya və vergi siyasətinə toxunaraq, deportasiya, sərhədlərin təhlükəsizliyi, kömür və nüvə enerjisinin genişləndirilməsi ilə enerji qiymətlərinin aşağı salınması məsələlərini diqqət mərkəzində saxlayıb. Nisbətən balanslı yanaşma nümayiş etdirən Robert Habek əsasən əməkdaşlıq kontekstindən çıxış edərək, gənc nəsil üçün də bərabər fürsətlərin təmin olunmasının önəmini diqqətə çatdırıb. Fridrix Merts isə iqtisadiyyat və miqrasiya mövzularına geniş yer verərək, iqtisadi durğunluğun aradan qaldırılmasının zəruriliyini ön plana çıxarıb.
Miqrasiya siyasəti və təhlükəsizlik mövzusunda müzakirələr zamanı Fridrix Merts daha çox qanunsuz miqrantın ölkədən geri göndərilməsinin vacibliyini qeyd edib. CDU-nun ifrat sağçı AfD ilə hər hansı əməkdaşlığını inkar edən Fridrix Merts partiyasının parlamentdə bəzi səsvermələrdə AfD ilə birlikdə hərəkət etməsinə dair tənqidlərə cavab olaraq, belə bir əməkdaşlığın qəbuledilməz olduğunu bildirib. O, ABŞ-ın vitse-prezidenti Ceyms Deyvid Vensin Münxen Təhlükəsizlik Konfransındakı çıxışını sərt tənqid edərək, bunun Almaniya siyasətinə müdaxilə olduğunu vurğulayıb. Olaf Şolts da AfD ilə hər hansı əməkdaşlığın yolverilməz olduğunu diqqətə çatdıraraq, ABŞ-ın vitse-prezidenti Ceyms Deyvid Vensin ifrat sağçı partiyaların təcrid edilməməsi barədə açıqlamasını qəbuledilməz adlandırıb.
Alis Vaydel miqrasiya siyasətinin sərtləşdirilməsinin vacibliyini vurğulayaraq, sərhədlərin fasiləsiz nəzarət altında saxlanılmasını təklif edib, lakin bu prosesin necə həyata keçiriləcəyini açıqlamayıb. Robert Habek isə miqrasiya məsələsində daha balanslı yanaşma nümayiş etdirərək, inteqrasiyanın vacibliyini vurğulayıb və Avropa ölkələrinin birgə hərəkət etməsinin əhəmiyyətini diqqətə çatdırıb.
İqtisadiyyat və enerji siyasəti ilə bağlı müzakirələr zamanı namizədlər arasında fikir ayrılıqları müşahidə olunub. Fridrix Merts bürokratiyanın azaldılmasını və iqtisadiyyatın canlandırılmasının zəruriliyini qeyd edib. Olaf Şolts isə sosial siyasətə diqqət çəkərək, minimum əməkhaqqının artırılması və ədalətli vergi sisteminin yaradılmasını müdafiə edib. Alis Vaydel enerji qiymətlərinin aşağı salınması üçün nüvə və kömür enerjisindən istifadənin artırılmasını irəli sürərək, digər xərclərlə yanaşı, iqlim xərclərinin də azaldılması ilə 140 milyard avroya qənaət oluna biləcəyini iddia edib. Robert Habek isə bərpaolunan enerji mənbələrinə investisiyaların artırılmasının vacibliyini vurğulayıb.
Ukrayna münaqişəsi və xarici siyasət məsələlərindən danışılarkən Fridrix Merts Prezident Vladimir Putinin “Böyük Rusiya” yaratmaq niyyətində olduğunu və NATO ərazisini hədəfə aldığını bildirib. Olaf Şolts Ukraynanın müdafiə qabiliyyətinin qorunmasının vacibliyini vurğulayıb və bu ölkənin iştirakı olmadan hər hansı qərarın qəbul edilməsinin doğru olmadığını diqqətə çatdırıb. Ukraynanın silahsızlandırılmasının qəbuledilməz olduğunu qeyd edən SPD-nin namizədi bildirib ki, bu ölkə özünü müdafiə edə biləcək qabiliyyətdə olmalıdır. Alis Vaydel Qərbin Rusiyanı təhrik etdiyini iddia edərək, Almaniyanın bu məsələdə neytral mövqe tutmalı olduğunu söyləyib.
Qeyd edək ki, teledebat namizədlərin mövqelərinin aydınlaşdırılması və seçicilərin qərar verməsinə kömək etmək baxımından böyük maraqla qarşılanıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
