Almaniyada Kansler Fridrix Mertsə və koalisiya hökumətinə ictimai dəstək artmaqdadır
Berlin, 24 may, AZƏRTAC
Almaniyada keçirilən son rəy sorğuları Federal Kansler Fridrix Mertsə və onun başçılıq etdiyi koalisiya hökumətinə ictimai dəstəyin artdığını göstərir.
AZƏRTAC xəbər verir ki, INSA Tədqiqat İnstitutunun “Bild” qəzetinin sifarişi ilə apardığı rəy sorğusuna əsasən, Xristian Demokratlar İttifaqı/Xristian Sosialistlər İttifaqı (CDU/CSU) hazırda 27 faiz seçici dəstəyinə malikdir. Bu, əvvəlki həftəyə nisbətən bir faiz artım deməkdir. SPD isə 16 faizlə sabit qalır. İfrat sağçı Almaniya üçün Alternativ (AfD) partiyasının reytinqi isə bir faiz geriləyərək 24 faizə düşüb.
ZDF televiziyasının yayımladığı Politbarometr sorğusunda AfD-nin dəstəyi 23 faiz olaraq əksini tapıb. Eyni sorğuda Yaşıllar Partiyası 12, Sol Partiya isə 10 faiz seçici rəğbəti qazanıb. Digər partiyalar beş faizlik baryeri keçə bilməyib.
INSA sorğusuna əsasən, respondentlərin 34 faizi federal hökumətin fəaliyyətini “yaxşı” qiymətləndirib ki, bu da ötən həftəyə nisbətən 8 faiz artım deməkdir. ZDF Politbarometrində isə hökumətin işi 51 faiz tərəfindən “yaxşı” və ya “əla” kimi dəyərləndirilib.
Kansler Fridrix Merts də fərdi reytinqlərdə irəliləyişə nail olub. Həm INSA, həm də ZDF sorğularında respondentlərin 47 faizi onun fəaliyyətindən razı qaldığını bildirib.
Berlin
Bölmənin digər xəbərləri
