Almaniyada Sosial Demokrat Partiyasının üzvləri koalisiya müqaviləsinin lehinə səs veriblər
Berlin, 30 aprel, AZƏRTAC
Sosial Demokrat Partiyasının (SPD) üzvləri Xristian Demokratlar İttifaqı (CDU) və Xristian Sosialist İttifaqı (CSU) ilə birgə koalisiya hökumətinin qurulmasına dair müqavilənin lehinə səs veriblər.
AZƏRTAC “Tagesschau” xəbər xidmətinə istinadla bildirir ki, səsvermədə iştirak edənlərin 84,6 faizi müqavilənin lehinə səs verib. Səsvermədə üzvlərin 56 faizi iştirak edib ki, bu da tələb olunan minimum 20 faizlik həddi xeyli üstələyib.
Aprelin 15-dən etibarən onlayn formatda keçirilən səsvermədə partiyanın 358 min üzvü 144 səhifəlik “Almaniya üçün məsuliyyət” adlı koalisiya sənədinə münasibət bildirmək imkanı qazanıb. Bundan əvvəl CDU və CSU partiyalarının rəhbər orqanları da koalisiya müqaviləsini təsdiqləyib. Bu partiyalar hökumətdə nazir vəzifələrini tutacaq namizədləri də artıq elan edib.
SPD rəhbərliyi isə partiyanın hökumətdə təmsil olunacaq yeddi nazirini mayın 5-də təqdim edəcək. Partiyanın sədri Lars Klinqbaylın vitse-kansler və maliyyə naziri vəzifələrini tutacağı gözlənilir. HAzırkı müdafiə naziri Boris Pistoriusun öz vəzifəsində qalacağı ehtimal edilir.
CDU, CSU və SPD arasında koalisiya müqaviləsinin mayın 5-də imzalanması planlaşdırılır. Mayın 6-da isə CDU-nun lider Fridrix Mertsin Bundestaqda Kansler seçilməsi gözlənilir.
Federal Kansler Federal Prezidentin təklifi ilə gizli səsvermə yolu ilə seçilir. Bunun üçün Bundestaq üzvlərinin əksəriyyətinin - 316 deputatın səsi lazımdır. Fridrix Merts Kansler seçildikdən sonra Bellevue sarayında Federal Prezident Frank-Valter Ştaynmayer tərəfindən təyinat sertifikatı təqdim olunacaq. Bundan sonra yeni Kansler Bundestaqda and içərək rəsmən səlahiyyətlərinin icrasına başlayacaq.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
