ALMANİYADA YAŞAYAN SOYDAŞIMIZ MÜSTƏQİL AZƏRBAYCANIN HƏRTƏRƏFLİ İNKİŞAFINDAN MƏMNUNDUR
Azərbaycan Xalq Cümhuriyyətinin qurucularından biri, xarici işlər və daxili işlər naziri işləmiş Məhəmməd Həsən Hacınskinin nəticəsi, hazırda Almaniyada yaşayan Oliver Hacı həyat yoldaşı Şahnaz xanımla bir həftədir ki, Bakıda səfərdədir.
AZƏRTAC xəbər verir ki, peşəsinə görə fotojurnalist olan Oliver Hacı paytaxtımızın tarixi yerlərini gəzərək lentə almışdır. O, ulu babası haqqında yazılmış “Məhəmməd Həsən Hacınski” monoqrafiyasının müəllifi, Bakı Dövlət Universitetinin jurnalistika fakültəsinin professoru Aydın Dadaşovla, eləcə də yaxın qohumları - əməkdar mədəniyyət işçisi Cahangir İldırımzadə və Suriyyə xanımla görüşmüş, qaçqın və məcburi köçkünlərin müvəqqəti məskunlaşdığı yerlərdə olmuş, doğma yurd-yuvalarından didərgin düşmüş soydaşlarımızın problemləri ilə yaxından tanış olmuşdur.
Almaniyadakı diasporumuzun fəal üzvlərindən olan Oliver Hacı səfər zamanı gördüklərindən, respublikamızın hərtərəfli inkişafından məmnunluğunu vurğulamış, qayıdandan sonra ölkə ictimaiyyətini Azərbaycan həqiqətləri ilə yaxından tanış edəcəyini bildirmişdir.
######
