Almaniyanın siyasi rəhbərliyi Hanau faciəsinin ildönümündə irqçiliyə qarşı mübarizəyə dair çağırış edib
Berlin, 20 fevral, AZƏRTAC
Almaniyanın Hanau şəhərində beş il əvvəl irqçilik zəminində törədilən və 4-ü türk əsilli olmaqla 9 nəfərin həlak olduğu hücumun ildönümü ilə əlaqədar anım mərasimi keçirilib.
AZƏRTAC yerli mediaya istinadla xəbər verir ki, mərasimdə çıxış edən Almaniya Prezidenti Frank-Valter Ştaynmayer irqçiliyə və nifrətə qarşı birgə mübarizənin önəmini xüsusi vurğulayıb. Bu hücumun həm də Almaniyada həmrəyliyə, açıq cəmiyyətə və liberal demokratiyaya qarşı törədildiyini diqqətə çatdıran Frank-Valter Ştaynmayer siyasətçilərin və aidiyyəti məmurların bu hadisənin dərindən araşdırmalı və ondan dərs çıxarmalı olduqlarını bildirib.
Cəmiyyətin hər bir üzvünün gündəlik həyatda irqçilik hallarına qarşı həssas olmağa və mübarizə aparmağa çağıran Almaniya Prezidenti fevralın 23-də keçiriləcək federal seçkilərlə bağlı vətəndaşlara müraciət edərək deyib: "Səsvermədə iştirak edək, hər bir şəxsin şərəf və ləyaqətinə hörmət edilməsini və qorunmasını təmin edən demokratiyamızı gücləndirək”.
Hanau faciəsinin ildönümü ilə əlaqədar Kansler Olaf Şolts və xarici işlər naziri Annalena Berbok da açıqlama yayıb, nifrət, şiddət və irqçiliyə qarşı mübarizənin zəruriliyini qeyd ediblər.
Xatırladaq ki, 2020-ci il fevralın 19-da Hessen əyalətinin Hanau şəhərində 43 yaşlı Tobias Ratyen adlı şəxs irqçilik zəminində 9 nəfəri odlu silahla qətlə yetirdikdən sonra evə gedərək anasını öldürüb, özü də intihar edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
