ALMANİYANIN XARİCİ İŞLƏR NAZİRİ QAZAXISTANDARƏSMİ SƏFƏRDƏDİR

02.11.2006 [10:48]
Çap et
A⁺ A^-

AZƏRTAC-ın xüsusi müxbiri Qazaxıstan hökumətinin mətbuat xidmətinə istinadla xəbər verir ki, baş nazir Danial Əhmədov bu ölkədə rəsmi səfərdə olan Almaniyanın xarici işlər naziri Frank-Valder Ştaynmayer ilə görüşmüşdür.

Baş nazir Qazaxıstanın iqtisadi inkişafı haqqında məlumat vermiş, informasiya, nüvə və kosmik texnologiyalar sahələrində əməkdaşlığın daha da inkişaf etdirilməsinə dair təkliflər vermişdir.

Bildirilmişdir ki, Qazaxıstanda 700 birgə müəssisə fəaliyyət göstərir və bu il iki ölkə arasında mal dövriyyəsi 1,6 milyard dollar olmuşdur.

Xarici işlər naziri Qasımcomərd Tokayevin Frank-Valder Ştaynmayerlə görüşündə Qazaxıstanın 2009-cu ildə ATƏT sədrliyinə namizədliyi məsələsi müzakirə edilmişdir.

Q.Tokayev bildirmişdir ki, Almaniya da daxil olmaqla ATƏT-in üzvü olan ölkələrin əksəriyyəti Qazaxıstanın namizədliyini dəstəkləyir.

Xatırladaq ki, Qazaxıstanın 2009-cu ildə ATƏT sədrliyinə namizədliyi məsələsinə bu ilin dekabr ayında baxılacaqdır.