ANAMA maarifləndirici təlimləri davam etdirir
Bakı, 3 avqust, AZƏRTAC
UNICEF-in məlumatına əsasən, hər il dünyada 22 mindən çox mülki şəxs mina və müharibənin partlayıcı qalıqlarının qurbanı olur. Bu qurbanların yarıdan çoxunu uşaqlar və gənclər təşkil edir. Oyuncaq və ya fərqli görünüşdə olan sursatlar onların diqqətini cəlb edir, toxunduqda isə partlayış baş verir və ağır fəsadlarla nəticələnir.
Bu kimi halların qarşısını almaq məqsədilə Azərbaycan Respublikasının Minatəmizləmə Agentliyi (ANAMA) tərəfindən “İrəli” İctimai Birliyinin 19 əməkdaşı və birliyin “Marş irəli-3” layihəsinin iştirakçısı olan 17-25 yaşlı 80 gənc üçün Göygöl rayonunda partlayıcı sursat təhlükəsinə dair maarifləndirmə tədbiri keçirilib.
ANAMA-dan AZƏRTAC-a bildiriblər ki, maarifləndirmə proqramı çərçivəsində heyətə müxtəlif növ hərbi sursat və minaların vizual olaraq tanınması, onların vurduğu ziyan, mina təhlükəsinin izahı, təhlükənin dərk edilməsi, tanış olmayan ərazilərdə davranış qaydaları, təhlükəli ərazidə olarkən davranış və təhlükə haqda məlumat vermə barədə təlimatlar verilib. Təlimlər zamanı iştirakçılara xəbərdaredici və maarifləndirici qaydalara dair broşür və posterlər paylanıb.
Mina və partlayıcı sursat təhlükəsinə dair maarifləndirmə biliklərinə yiyələnən gənclər təlim zamanı əldə etdikləri bilikləri həmyaşıdları ilə də bölüşərək, geniş maarifləndirmə işinə dəstək olacaq. Bununla da onlar mina təhlükəsi riskinin azaldılması, vətəndaşlarımızın minadan zərərçəkmə hallarının qarşısının alınmasına töhfə verəcəklər.
Agentlik tərəfindən müharibədən zərərçəkmiş ərazilərdə maarifləndirici tədbirlər davam etdirilir. İşğaldan azad edilmiş ərazilərdə bərpa və quruculuq, energetika, kənd təsərrüfatının fərqli sahələri üzrə fəaliyyət göstərən qurumların nümayəndələrinə təhlükəsizlik qaydaları barədə xəbərdaredici və maarifləndirici təlimlər keçirilib.
Vətən müharibəsindən sonrakı dövrdə böyük əksəriyyətini gənclər və məktəb yaşlı uşaqlar təşkil edən 170 minə yaxın insan müxtəlif vasitələrlə maarifləndirmə tədbirlərinə cəlb olunub. Gənclər və yeniyetmələrin iştirakı ilə maarifləndirmə istiqamətində layihələr davam etdiriləcək. Bu kimi maarifləndirmə tədbirlərinin həyata keçirilməsi gələcəkdə Qarabağa qayıdacaq əhalinin təhlükəsizliyi üçün dəstək olacaq.
Bölmənin digər xəbərləri
