Anar Bağırov: Xanımlar üçün vəkillik çox gözəl peşədir
Bakı, 14 dekabr, AZƏRTAC
“Biz çalışırıq ki, ən layiqli şəxslər vəkil olsun. Bu gün vəkil olmaq elə də asan iş deyil. İmtahanlar sualların mürəkkəbliyinə görə hakimlərin verdiyi imtahanlarla demək olar ki, eynidir. Hesab edirəm ki, imtahanlara daha da yaxşı hazırlaşmaq lazımdır. Çünki vəkilin bilik səviyyəsi prokurorun, hakimin, müstəntiqin biliyindən aşağı olmamalıdır. Ölkədə vəkillik fəaliyyəti gücləndikcə və vəkillərin sayı artdıqca vəkillər məhkəmə sistemində əsas kadr bankına çevrilib. Yeni təyin olunan hakimlər sırasında vəkillər ön sıralardadır. Bu, onu deməyə əsas verir ki, getdikcə vəkillərin məhkəmə fəaliyyətində rolu daha da artacaq”.
Bu sözləri AZƏRTAC-a eksklüziv müsahibəsində Vəkillər Kollegiyasının sədri Anar Bağırov deyib.
Ölkədə vahid test imtahanının keçirilməsini vacib hesab edən A.Bağırov bildirib ki, vəkilləri, hakimləri, prokurorları ayrıca testdən keçirməyə ehtiyac olmamalıdır.
“Yazılı imtahan vahid olmalıdır. İnkişaf etmiş cəmiyyətlərdə belə bir təcrübə var. Ümid edirəm ki, gələcəkdə bu məsələlər öz həllini tapacaq. Bir çox ölkələrdə bütün hüquqşünaslar vahid test imtahanı verirlər. Test ancaq beş il ərzində qüvvədə olur, onlar sertifikat alırlar. Sonra müxtəlif qurumlarda bu nəticələrlə əlavə imtahanlar da verə bilərlər. Bu, çox düzgün olardı. Arzu edərdim ki, gələcəkdə bu məsələlər öz həllini tapsın. Bizi narahat edən ikinci məsələ - vəkillikdə gender balansı məsələləridir. 2018-ci ilin əvvəlində yalnız vəkillərin 14 faizini xanımlar təşkil edirdi, 86 faiz vəkil isə kişilərdən ibarət idi. Bu, çox xoş olmayan statistika, göstərici idi. Deyə bilərəm ki, yenə də ardıcıl, məqsədyönlü atılan addımlar nəticəsində bu statistikanı xeyli dəyişə bilmişik. Bu sahədə gənc xanım hüquqşünaslar arasında görüşlər, müzakirələr, diskussiyalar, treninqlər baş tutub. Həmçinin Vəkillər Kollegiyasında Qadın Vəkillər Alyansı yaradılıb. Hazırda qadın vəkillərin sayı xeyli artıb və ümumi vəkillər sırasında 415 nəfər qadın vəkilimiz var. Bu müsbət dinamika getdikcə davam edəcək. Qonşu ölkələrdə: Türkiyə, İran, Qazaxıstan, Rusiya, Gürcüstanda haradasa balans var. Yalnız bizdə belə statistika var idi. Hesab edirəm ki, xanım hüquqşünasların potensialından gələcək vəkillik üçün biz geniş istifadə etməliyik. Əslində xanımlar üçün vəkillik çox gözəl peşədir. Azad şəkildə həm ailə ilə, həm də sevimli işinlə məşğul ola bilirsən. Bu peşədə yaş həddi olmadığı üçün istədiyin qədər işləyə də bilərsən. Vəkillər Kollegiyasının üzvləri Kollegiyadan nə əməkhaqqı, nə rütbə, nə də vəzifə alırlar. Mən də vəkiləm, onlar da vəkildir. Hamımızın mantiyası eynidir və bu, bizim bərabərliyimizi göstərir. Əslində isə bizim vahid mantiyamız peşə həmrəyliyimizin və bütün vəkillərin bərabər hüquqlara malik olduğunun bir rəmzidir”, - deyə A.Bağırov vurğulayıb.
Vəkillər Kollegiyasının Rəyasət Heyətinin sədri Anar Bağırovun AZƏRTAC-a geniş müsahibəsi yaxın müddətdə yayımlanacaq.
Bölmənin digər xəbərləri
