Anar Rzayev: Fərqlənmə nişanı icazə kimi verilsə də, fiskal alət kimi çıxış edir
Bakı, 12 iyun, AZƏRTAC
Fərqlənmə nişanı verilməsindən imtina etmək mümkün deyil. Fərqlənmə nişanı icazə kimi verilsə də, fiskal alət kimi çıxış edir.
AZƏRTAC xəbər verir ki, bunu Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev Milli Məclisin İqtisadi siyasət, sənaye və sahibkarlıq komitəsinin iyunun 12-də keçirilən iclasında “Avtomobil nəqliyyatı haqqında” qanuna dəyişikliklərlə bağlı qanun layihəsinə münasibət bildirərkən deyib.
İki sahənin tənzimləmədən kənarda qaldığını diqqətə çatdıran AYNA-nın İdarə Heyətinin sədri qeyd edib ki, bu, sərnişin daşımaları ilə məşğul olan taksi operatorları və qeyri-taksi operatorları ilə bağlıdır. Bəzi təşkilatlar qanunvericilikdəki boşluqdan istifadə edirlər. Dəyişikliklər bu məqsədlə həyata keçirilir.
Daşıyıcıların və sürücülərin mövcud standartlara uyğun olmadığını diqqətə çatdıran Anar Rzayev bildirib ki, təklif olunan dəyişikliyə əsasən, qanuna taksometr, analoq taxoqraf , rəqəmsal taxoqraf, sürücünün taxoqraf kartı, operatorun taxoqraf kartı, formulyar sənəd, taksi sifarişi operatoru, buraxılış vəsiqəsi və buraxılış kartı kimi yeni anlayışlar əlavə edilir.
Qaydanı pozanlar üçün cərimələrin də tətbiq olunacağını diqqətə çatdıran Anar Rzayev əlavə edib ki, ölkədaxili sifarişli daşımalara taksi minik avtomobili ilə sərnişin daşımaları istisna olmaqla, qeyri-müntəzəm sərnişin daşımaları və ölkədaxili yük daşımaları aid edilir.
Bölmənin digər xəbərləri
