Antonio Koşta: Avropa Ukrayna üzrə danışıqlarda iştirak etməlidir
Bakı, 17 fevral, AZƏRTAC
Rusiyadan qaynaqlanan “qlobal təhlükəni” nəzərə almalı olan yeni təhlükəsizlik arxitekturasını müzakirə etmək üçün Avropa Ukrayna danışıqlarına cəlb edilməlidir.
AZƏRTAC “Financial Times” qəzetinə istinadla xəbər verir ki, bunu Avropa İttifaqı Şurasının Prezidenti Antonio Koşta deyib. Onun fikrincə, Moskva ilə Kiyev arasında danışıqlar zəruridir, lakin münaqişə Avropanın təhlükəsizliyinə təsir etdiyi uçun Brüssel də bu prosesdə iştirak etməlidir.
“Yeni təhlükəsizlik arxitekturasının qurulmasında avropalılar əsas aktor olmalıdır... Söhbət təkcə Ukraynadan getmir. Yeni təhlükəsizlik arxitekturasına dair danışıqlar zamanı Rusiyanın təkcə Ukrayna üçün deyil, bütün dünya üçün təhlükə yaratdığı nəzərə alınmalıdır”, - deyə Koşta vurğulayıb.
Xatırladaq ki, fevralın 12-də ABŞ Prezidenti Donald Tramp və Rusiya lideri Vladimir Putin arasında təxminən saat yarım davam edən telefon danışığı olub. Rusiya dövlət başçısının mətbuat katibi Dmitri Peskovun məlumatına görə, telefon danışığında, əsasən Ukraynadakı vəziyyətin nizamlanması ilə bağlı məsələlər müzakirə edilib. Ağ evin rəhbəri həmçinin Səudiyyə Ərəbistanında Vladimir Putinlə görüşmək planlarını açıqlayıb.
Bölmənin digər xəbərləri
