Aparat rəhbəri: Son iki ildə heç bir radio kanalının lisenziyası ləğv olunmayıb
Bakı, 21 sentyabr, AZƏRTAC
Radio kanallardan 17-si ümumölkə və 4-ü regional yerüstü analoq FM yayımındadır ki, Azərbaycanda FM radio yayımı açıq (ödənişsiz) yayım hesab olunur.
Bu barədə AZƏRTAC-ın sorğusuna cavab olaraq Azərbaycan Respublikası Audiovizual Şurasının Aparat rəhbəri Fazil Novruzov deyib.
Aparat rəhbərinin sözlərinə görə, son 2 ildə lisenziyası ləğv olunmuş radio kanalı yoxdur.
“RadioGarden” və bu kimi tətbiqlər vasitəsilə hər hansı bir radio kanalı dinləməkdə çətinlik olması məsələsinə gəlincə, bu sualı həmin radio yayımçıya ünvanlamağınızı tövsiyə edirik. Belə ki, “Media haqqında” Qanuna görə yerüstü yayımçı proqramları internet, videopaylaşım platformaları və müxtəlif tətbiqlər vasitəsilə yayımlana bilər. Lakin bu məcburi tələb deyil və yalnız yayımçının öz seçimindən asılıdır”, - deyə Fazil Novruzov qeyd edib.
Aparat rəhbəri bu günə qədər Azərbaycanda 90 audiovizual media subyektinə 131 lisenziya verildiyini vurğulayıb: “Bu lisenziyalara uyğun olaraq hazırda 40 televiziya kanalı, 21 radio kanalı, 4 sifarişli yayım xidməti, 2 multipleks operatoru, 43 universal platforma operatoru və 10 sadə platforma operatoru fəaliyyət göstərir. 40 televiziya kanalından 11-i ümumölkə və 10 regional yerüstü televiziya kanalıdır ki, həmin ümumölkə kanalları bütün ölkə ərazisində, regional kanallar isə müvafiq region ərazisində açıq (ödənişsiz) yayımlanır. Yerüstü yayımda kanalların artırılması üçün müsabiqə elan olunmalıdır. Audiovizual Şura mütəmadi olaraq belə müsabiqələr keçirir”.
FM yayımında yaranan müəyyən texniki problemlərə gəlincə, aparat rəhbəri bildirib ki, vətəndaşlar bununla bağlı Audiovizual Şuraya müraciət edirlər.
“Bizim mütəxəssislər hər bir müraciət üzrə zəruri araşdırma, ehtiyac olduqda monitorinq aparır, yayımın hansı səbəbdən maneəli olmasını və ya heç olmamasını vətəndaşlarımıza izah edir və həlli yollarının göstərirlər. Vətəndaşlarımız bu məsələ ilə bağlı yayımçılara da müraciət edə bilərlər”, - deyə Fazil Novruzov qeyd edib.
Qeyd edək ki, Azərbaycan radio kanallarının bütün ölkə üzrə yerüstü yayımda əlçatanlığının təmin olunması üçün ölkə başçısının 2023-cü ilin 24 iyul tarixində imzaladığı Sərəncamın icrası davam edir. Sərəncama uyğun olaraq, Rəqəmsal İnkişaf və Nəqliyyat Nazirliyinə bu məqsədlə 13,7 milyon manat pul ayrılıb. Sözügedən nazirliyin tabeliyində olan “Radio Televiziya Yayımı və Peyk Rabitəsi” İstehsalat Birliyi (qısaca: “Teleradio” İB) Azərbaycan Respublikası Audiovizual Şurası ilə birgə ölkə üzrə 17 ən əhəmiyyətli radio-televiziya yayım stansiyalarını müəyyən edib. Həmin stansiyalardan ümumölkə statuslu radio kanalların yayımının tam təmin olunması üçün “Teleradio” İB tərəfindən zəruri verici-ötürücü avadanlıqlar sifariş edilib. Radioyayım şəbəkəsinin müasirləşdirilməsi və genişləndirilməsi məqsədilə nəzərdə tutulan 176 ədəd FM radioyayım ötürücüsünün, 60 dəst anten sisteminin, 48 ədəd cəmləmə qurğusunun, 67 ədəd peyk avadanlığının, 44 ədəd RDS qurğusunun xaricdən ölkəyə gətirilməsi artıq təmin edilib. Eyni zamanda, Azərbaycan Respublikası Audiovizual Şurasının müvafiq qərarları ilə həmin 17 stansiyadan 127 radiotezlik radio yayımçıların istifadəsi üçün ayrılıb. Həmin stansiyaların əksəriyyətində avadanlıqların quraşdırılması işi başa çatdırılıb və sınaq yayımlarına başlanılıb. Hazırda ayrılmış radiotezlik nominallarının qonşu ölkələrlə koordinasiyası işləri, texniki-tənzimləmə, habelə zəruri təmir işləri həyata keçirilir. İntensiv aparılan işlərin 2024-cü ilin sonuna qədər başa çatması nəzərdə tutulub.
Bölmənin digər xəbərləri
