Aqiyə Naxçıvanlı: Azərbaycanın iqtisadi gücü bundan sonra daha da artacaq
Bakı, 14 aprel, AZƏRTAC
Aprel ayının 12-də bu ilin birinci rübünün yekunlarına həsr olunan müşavirədə Prezident İlham Əliyevin bu ilin sonuna qədər və növbəti iki il ərzində görüləcək işlərlə bağlı verdiyi tapşırıqlar, əslində, Azərbaycanın yaxın dövr üçün konseptual inkişaf proqramıdır. İlk növbədə, birmənalı olaraq qeyd etmək lazımdır ki, 2021-ci il ölkəmizin həyatında son dərəcə əlamətdar bir il olmuşdur. 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə şanlı Ordumuzun əldə etdiyi tarixi Qələbə nəticəsində işğaldan azad edilmiş ərazilərdə bərpa işlərinə başlanması keçən il Azərbaycanın qarşısında duran iki əsas məsələdən biri idi. Digər vacib məsələ isə beynəlxalq müstəvidə yeni reallıqları qəbul etdirməkdən ibarət idi. Bu gün hər iki istiqamət üzrə müsbət nəticələr əldə olunub, Azərbaycan qarşısına qoyduğu vəzifələrin icrasını yüksək səviyyədə həyata keçirib.
AZƏRTAC xəbər verir ki, bu sözləri Azərbaycan Respublikası Milli Məclisinin deputatı, professor Aqiyə Naxçıvanlı deyib.
Ölkəmizin beynəlxalq əlaqələri inkişaf etdirmək istiqamətində də böyük uğurlar əldə etdiyini qeyd edən deputat bildirib: “Ötən il ərzində ölkəmizin beynəlxalq təşkilatlarla fəal əməkdaşlığı davam edib, dövlətimizin ciddi səyləri nəticəsində dünyanın aparıcı beynəlxalq təşkilatları yeni reallıqları qəbul ediblər. BMT xətti ilə Şuşa şəhərində Azərbaycanın BMT-yə üzvlüyünün 30 illiyinə həsr edilmiş tədbir keçirilib. Dövlətimizin başçısının da çıxışında qeyd etdiyi kimi, bu, çox əlamətdar hadisə idi. Bu tədbirin məhz BMT xətti ilə keçirilməsi bir daha onu göstərdi ki, BMT Azərbaycanın ərazi bütövlüyünü tam tanıyan qurumdur. Bu faktı da diqqətdən kənarda qoymaq olmaz ki, Azərbaycan tərəfindən Qarabağ münaqişəsinin həlli, eyni zamanda, BMT-nin üzərindən öz qətnamələrin icra olunmaması ilə bağlı yükü götürmüş oldu. Həmçinin BMT-dən sonra ən böyük beynəlxalq təsisat olan Qoşulmama Hərəkatına hazırda Azərbaycanın sədrlik etməsi də ölkəmizin yüksək beynəlxalq nüfuzunun göstəricisidir. Qoşulmama Hərəkatı Azərbaycan bu hərəkata üzv olandan dərhal sonra keçmiş münaqişə ilə bağlı ədalətli mövqe nümayiş etdirib. Qoşulmama Hərəkatı həm müharibədən əvvəl, işğal dövründə, həm müharibə dövründə, həm də müharibədən sonra Azərbaycanla birmənalı şəkildə həmrəy olub. Bundan başqa, İslam Əməkdaşlıq Təşkilatının işğal dövründə dəfələrlə Azərbaycanın mövqelərini əks etdirən qərar-qətnamələr qəbul etməsini də vurğulamaq lazımdır. İslam Əməkdaşlıq Təşkilatının xarici işlər nazirləri səviyyəsində toplantısında bir daha Azərbaycanın mövqeyini dəstəkləyən bir neçə qətnamə, o cümlədən Azərbaycanın tarixi-dini abidələrinin ermənilər tərəfindən dağıdılmasına dair önəmli sənədlər qəbul edilib”.
Aqiyə Naxçıvanlı xüsusi vurğulayıb ki, Azərbaycanla Avropa İttifaqı arasında təmasların müharibədən sonra daha intensiv xarakter alması artıq Ermənistanı da öz mövqelərini yenidən gözdən keçirməyə məcbur edib. Avropa İttifaqı postmünaqişə dövrünün reallıqlarını artıq birmənalı olaraq qəbul edib. Təsadüfi deyil ki, Avropa İttifaqı Şurasının Prezidenti Şarl Mişelin təşəbbüsü ilə dekabr və aprel aylarında keçirilmiş üçtərəfli görüşlərin nəticəsi olaraq imzalanmış yekun bəyanatda “Dağlıq Qarabağ” ifadəsi də yer almayıb. Təbii ki, bu da Prezident İlham Əliyevin həyata keçirdiyi xarici siyasətin daha bir nəticəsidir. Hazırda Avropa İttifaqı Azərbaycan-Ermənistan əlaqələrinin normallaşması ilə məşğuldur və son aprel görüşündə bu məsələlər müzakirə edilib. Azərbaycan iki ölkə arasındakı əlaqələri normallaşdırmaq üçün 5 prinsipdən ibarət təklif verib. Ermənistan tərəfi də bu təklifə müsbət yanaşıb və Brüssel görüşünə qədər artıq bu açıqlamalar verilib. Azərbaycanın ərazi bütövlüyü qəbul edilir və Ermənistan Azərbaycana ərazi iddiasından əl çəkir. Qeyd etmək lazımdır ki, bu günlərdə 30 il ərzində birinci dəfə Azərbaycanın və Ermənistanın xarici işlər nazirləri arasında telefon danışığının baş tutması da diqqətəlayiq hadisədir. Dövlətimizin başçısının dediyi kimi, bu təcrübə müsbət qiymətləndirilməlidir və iki ölkə arasındakı münasibətləri iki ölkə həll etməlidir”.
Deputat, həmçinin bildirib ki, azad edilmiş torpaqların yüz faiz daxili imkanlar hesabına bərpa olunması, bu məqsədlə heç bir xarici ölkədən bir manat da vəsaitin istənilməməsi Azərbaycanın iqtisadi qüdrətini bir daha nümayiş etdirir. “Prezident İlham Əliyev müşavirədəki çıxışında bir daha aydın şəkildə bəyan etdi ki, Azərbaycanın əldə etdiyi bütün nailiyyətlər ölkənin daxili imkanlarının hesabına əldə olunub. Azərbaycan heç kimdən bir manat da olsun dəstək almayıb. Azad edilmiş torpaqlar da tamamilə daxili imkanlar hesabına bərpa olunur. Xarici şirkətlər isə həmin ərazilərdə yalnız podratçı qismində çalışırlar. Bütün bunlar bir daha sübut edir ki, Azərbaycan həqiqətən də güclü iqtisadiyyata malik olan bir dövlətdir və bundan sonra bu güc daha da artacaq”, - deyə A.Naxçıvanlı fikirlərini yekunlaşdırıb.
Bölmənin digər xəbərləri
