Bakı, 11 dekabr, AZƏRTAC

Misli Premyer Liqasında 39 xalla turnir cədvəlinə liderlik edən “Araz-Naxçıvan” klubunun baş məşqçisi Elmar Baxşıyev AZƏRTAC-ın suallarını cavablandırıb. Həmin müsahibəni təqdim edirik:

- Komandanız Misli Premyer Liqasının XVI turunda “Səbail”ə qalib gələrək, tarixində ilk dəfə Azərbaycan çempionatında həftəni lider kimi başa vurdu. “Araz-Naxçıvan”ın uğurlu çıxışının sirri nədədir?

- Deməzdim ki, bunun xüsusi bir sirri var. Keyfiyyətli, mehriban futbolçularımız və nizam-intizama riayət edən, uğur üçün ac olan heyətimiz var. İntizam kollektiv oyunlarda çox önəmlidir. Çalışırıq ki, hər həftə keçirəcəyimiz qarşılaşmaya yaxşı hazırlaşaq, üzərimizə düşəni edək. Buraya addım-addım gəlmişik. Müəyyən hədəflərimiz, istəklərimiz var. Şükürlər olsun ki, komandamız uğurla yoluna davam edir.

- Bəlkə də bir çoxları mövsümün əvvəlində komandadan bu nəticələri gözləmirdi...

- Biz komanda olaraq bir-birimizə inanırıq. Heyətə elə futbolçular cəlb etmişik ki, əksəriyyəti ilə müxtəlif illərdə birgə işləmişik, hansi xarakterə, qabiliyyətə malik olduqlarını bilirik. İnanmaq və çox işləməklə onu reallaşdırmaq lazımdır.

- “Araz-Naxçıvan” kimi komandalar adətən qış fasiləsinə kimi yaxşı mübarizə aparsalar da, ikinci dövrədə eniş yaşayırlar. Siz də bu halla üzləşməkdən qorxmursunuz?

- Futbolda hadisələri əvvəlcədən proqnozlaşdırmaq çox çətindir. Məsuliyyətimizi anlayırıq, peşəkar insanlarla çalışırıq. Əlbəttə, qış fasiləsi zamanı güclənən, heyətinə əl gəzdirən komandalar olacaq. Amma biz öz işimizi görməli, oyunlarımıza köklənməliyik.

- Maraqlıdır, futbolçularınız çempionluq xəyalları qurmağa başlayıblar?

- Komandada kiminsə xəyal qurduğuna inanmıram. Yenə deyirəm, hər kəs bura niyə toplaşdığımızı bilir və həmin hədəfə çatmaq üçün mübarizə aparır. Təbii ki, mübarizəni fərdi yox, kollektiv olaraq aparırıq.

- Çoxları “Araz-Naxçıvan”ın praqmatik futbol oynadığını düşünür. Bu fikirlərə münasibətiniz necədir?

- Niyə praqmatik? Axı “Araz-Naxçıvan” hər oyunda 4-5 real qol epizodu yaradır, hücum qurmaqdan çəkinmir. Çatışmazlıq bu epizodları realizə etməklə bağlıdır. Bəlkə də az qol vurmağımız kimlərisə belə düşünməyə vadar edər. Ancaq oyuna baxan əksini düşünür.

- Sizin üçün mövsümü hansı pillədə bitirmək böyük uğur olar?

- Futbolda proqnoz vermək çətindir. Mümkün qədər üst sıralarda yer almaq istəyirik. Necə olacağını mayda - çempionatın yekununda görəcəyik.

- Hazırda komandada əsas çatışmazlıq nədir?

- İstənilən komanda hər zaman transferə ehtiyac duyur. Təbii ki, heyətin geniş olması rotasiya imkanlarını da genişləndirir. Qışda vəziyyətə baxacağıq. Klubsuz futbolçular arasında layiqlisini tapa bilsəm və həmin oyunçunun komandamıza fayda verəcək potensialda olduğunu görsəm, transfer edəcəyik.

- Azərbaycan Kubokunda da mübarizəni davam etdirirsiniz və 1/4 finalda “Zirə” ilə qarşılaşacaqsınız. Bu heyətlə mövsümün sonuna kimi iki cəbhədə mübarizə aparmaq çətin olmayacaq?

- “Zirə” güclü və iddialı klublarımızdandır. Kubokda mübarizəmizi sonadək davam etdirəcəyik. Komandama inanıram və yaxşı bilirəm ki, hər iki yarışda mübarizə aparacaq gücdəyik.

- Yəqin ki, qış transfer dövrü ilə bağlı planlar qurmusunuz...

- Qış fasiləsində vaxt az olacaq. Maksimum 10-12 günlük hazırlıq keçə biləcəyik. Bakıda hazırlaşacağıq və 1-2 yoxlama oyununda gücümüzü sınayacağıq.

- Azərbaycanda uğur qazandıqdan sonra özünüzü Avropada da sınamaq istəyərsiniz?

- Bunu zaman göstərəcək. Sadəcə, onu deyə bilərəm ki, uğur qazanmaq hər məşqçinin arzusudur.