ARDNŞ İLİN ƏVVƏLİNDƏN 5242,3 MİN TON NEFT HASİL ETMİŞDİR
Azərbaycan Dövlət Neft Şirkəti 2001-ci ilin yeddi ayı ərzində 5242,3 min ton neft hasil etmişdir. Şirkətin mətbuat xidmətindən AZƏRTAC-ın müxbirinə bildirmişlər ki, bu, nəzərdə tutulduğundan 1,4 faiz və ya 74,2 min ton çoxdur.
Yanvar-iyul aylarında quruda 918,3 min ton, dənizdə isə 4324 min ton neft çıxarılmışdır. Bu göstəricilərin birincisi nəzərdə tutulan həcmdən 6,2 faiz və ya 54 min ton, ikincisi isə 0,5 faiz və ya 20,2 min ton çoxdur. Bununla belə, yeddi ay ərzində dənizdə 2000-ci ilin həmin dövrü ilə müqayisədə hasilatın həcmi 0,8 faiz azalmış, kəsir 35,1 min ton olmuşdur. Quruda isə ötən ilin müvafiq dövrü ilə müqayisədə neft hasilatının həcmi 6 faiz və ya 51,6 min ton artmışdır.
ARDNŞ iyul ayında ümumilikdə 769,6 min ton, o cümlədən dənizdə 633,2 min ton, quruda 136,4 min ton neft çıxararaq, nəzərdə tutulan həcmi birinci göstəriciyə görə 0,6 faiz, ikinci göstəriciyə görə isə 7,6 faiz ötmüşdür.
Bölmənin digər xəbərləri
