ARDNŞ ÖLKƏDƏ “SOCAR” BRENDİ İLƏ DAHA İKİ YANACAQDOLDURMA MƏNTƏQƏSİ İSTİFADƏYƏ VERMİŞDİR
Bakı, 18 sentyabr (AZƏRTAC). Sentyabrın 18-də Azərbaycan Respublikası Dövlət Neft Şirkəti (ARDNŞ) Sabunçu dairəsi və Qala qəsəbəsi yaxınlığında “SOCAR” brendi ilə 2 yeni yanacaqdoldurma məntəqəsini istifadəyə vermişdir.
Açılış mərasimində ARDNŞ-in prezidenti Rövnəq Abdullayev, şirkətin rəhbər şəxsləri iştirak etmişlər.
ARDNŞ-in yanacaqdoldurma məntəqələrinin şəbəkəsini genişləndirdiyini deyən R.Abdullayev bununla ölkədə “SOCAR” brendli məntəqələrin sayının 5-ə çatdığını bildirmişdir. O, yanacaqdoldurma məntəqələrinin müasir standartlara tam cavab verdiyini söyləmişdir. İlin sonunadək daha 5 məntəqənin açılışı olacaqdır. Hazırda SOCAR brendi altında iki məntəqənin Bakı-Sumqayıt yolunda, ikisinin Bakı-Ələt yolunda və ikisinin Bakı şəhərinin Babək prospektində açılması üçün işlər aparılır. Ümumiyyətlə, şirkət paytaxtın giriş-çıxış istiqamətlərində, habelə respublika əhəmiyyətli magistral yollarının üzərində yanacaqdoldurma məntəqələrinin açılmasına böyük diqqət yetirir.
R.Abdullayev demişdir ki, ARDNŞ-in neft emalı zavodlarında istehsal olunan yanacaq Avropa standartlarına cavab verir və bütün yanacaqdoldurma məntəqələrinə eyni keyfiyyətdə məhsul paylanır.
######
 |
 |
 |
 |
Bölmənin digər xəbərləri
