ASK: Türk dövlətlərinin artımı dünya iqtisadi artımını 2 dəfə qabaqlayır
Bakı, 14 fevral, AZƏRTAC
Türk dövlətləri rəhbərlərinin dəstəyi ilə yaradılan Türk İnvestisiya Fondu ölkələr arasında iqtisadi münasibətlərin dəstəklənməsinə ciddi resurslarla dəstək verəcək.
AZƏRTAC xəbər verir ki, bunu Azərbaycan Sahibkarlar Konfederasiyası (ASK) və Türk Ticarət və Sənaye Palataları Birliyinin prezidenti Məmməd Musayev “Türk İnvestisiya Fondu və Türk Ticarət və Sənaye Palataları Birliyi(TCCI): Biznes Liderləri üçün Məlumatlandırma Görüşü və B2B” tədbirində deyib.
Onun sözlərinə görə, Türk İnvestisiya Fondunun digər beynəlxalq fondlarla, eləcə də türk dövlətlərinin investisiya fondları ilə qarşılıqlı əlaqələri mühüm əhəmiyyət kəsb edir.
"Türk Ticarət və Sənaye Palataları olaraq, biz bu fondun fəaliyyətinin gücləndirilməsi üçün birgə çalışacağıq. Bu gün ilk dəfə olaraq fond maliyyə vəsaitlərinin ayrılması, ondan istifadə qaydaları, qəbul olan layihələr üzrə seçim meyarları və maliyyələşdirmə mexanizmləri barədə açıqlamalar verəcək", - deyə Məmməd Musayev vurğulayıb.
Məmməd Musayev bildirib ki, türk dövlətlərinin ümum daxili məhsulu 900 milyard dolları ötür: "Bu isə qlobal ÜDM-in 1,7 faizi deməkdir. Türk dövlətlərinin iqtisadi artımı 6 faiz olmaqla dünya iqtisadi artımını təxminən 2 dəfə qabaqlayır. Bu rəqəmlər türk dövlətlərinin davamlı olaraq gücləndiyini əyani surətdə sübut edir. Hesab edirəm ki, bu platforma türk dövlətlərinin biznes-iş dünyasının bir-birini daha yaxından tanımasına xidmət edəcək", - deyə o qeyd edib.
Bölmənin digər xəbərləri
