Aslan Kərimov: AFFA İcraiyyə Komitəsinin son qərarları çempionatımız üçün ən doğru seçimdir
Bakı, 20 fevral, AZƏRTAC
“Açığı, 2025/2026-cı illər mövsümünün formatı ilə bağlı bir neçə variant var idi. Lakin hesab edirəm ki, AFFA-nın verdiyi yekun qərar çempionatımız üçün ən doğru seçimdir”.
Bu sözləri AZƏRTAC-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov milli assosiasiyanın İcraiyyə Komitəsinin iclasında qəbul olunmuş qərarlar barədə danışarkən deyib.
Veteran futbolçu Azərbaycan Premyer Liqasında növbəti mövsümün təsdiq olunmuş formatına münasibət bildirib: “Mən variantlar arasından “altılıq” sistemi olan formatın o qədər də ədalətli olmadığını bildirmişdim. Çünki bu formatda 6-cı və ya 7-ci sıralarda yer alan komandaların nə yuxarı pillələr uğrunda mübarizə aparmaq şansı qalır, nə də I Liqaya düşmək qorxusu olur. Belə olan halda həmin komanda üçün son turlarda keçirəcəyi matçlar hər hansı əhəmiyyət daşımır. Bu amilləri nəzərə alaraq, “altılıq” sisteminin çempionatımız üçün uyğun olmadığını vurğulamışdım. Düşünürəm ki, turnirin 12 komandanın iştirakı ilə 3 dövrədən (33 turdan) ibarət olması daha yaxşı qərardır”.
A.Kərimov yeni mövsümdə Premyer Liqaya yüksəlmək uğrunda bir oyundan ibarət pley-off görüşünün keçirilməsinin pis fikir olmadığını söyləyib: “Amma bu qərar “Qəbələ” və “Şamaxı” üçün haqsızlıqdır. Çünki onlar birbaşa I dəstəyə düşmüşdülər. Mən əminəm ki, bu komandalar pley-off oyunu keçirsəydilər, çempionatda qalacaqdılar. I Liqadan 3 komandanın yüksək dəstədə iştirakı da yaxşı qərardır. Sadəcə, burada dayanıqlılıqla bağlı problemlər ortaya çıxa bilər. Təbii ki, keyfiyyət olaraq yaxşı kollektiv formalaşdırmaq mümkündür. Bu kimi klubların Premyer Liqada nə qədər büdcə ilə iştirak edəcəkləri isə sual altındadır. Digər komandalarla, heç olmasa, başabaş mübarizə apara bilmələri üçün maliyyə dayanıqlılığı olmalıdır. Buna xüsusi diqqət etməlidirlər. Bir oyundan ibarət pley-off görüşünə gəldikdə isə əgər matçlar neytral meydanda keçiriləcəksə, bu, elə də böyük fərq yaratmayacaq. Bir oyunla hansısa komandanın haqqı tapdalanmayacaq. Güclü olan qalib gələcək. Avropa və dünya çempionatlarının finalı bir qarşılaşmadan ibarət olur. Belə çıxır ki, bu da ədalətsiz qərardır? Ona görə də düşünürəm ki, əlavə daha bir oyun oynamaq nəyisə dəyişməyəcək. Ola bilər ki, hansısa region komandası doğma meydanda daha yaxşı çıxış edir. Belə kiçik nüanslar var. Amma biz gərək ilk növbədə meydançalarımızı və stadionlarımızı təmin edə bilək. Meydançalarımız standartlara uyğun olmalıdır. Ondan sonra iki oyunun davasını edə bilərik”.
Bölmənin digər xəbərləri
