AŞPA bürosunda Azərbaycanla bağlı məsələlər müzakirə olunmuşdur
Strasburq, 27 iyun (AZƏRTAC). İyunun 27-də Avropa Şurası Parlament Assambleyasının (AŞPA) yay sessiyasına qurumun büro iclası ilə yekun vurulmuşdur.
Azərbaycanın AŞPA-dakı nümayəndə heyətinin rəhbəri Səməd Seyidov büroda müzakirə olunan məsələlərlə bağlı jurnalistlərə verdiyi müsahibəsində demişdir: “Bu gün büronun yığıncağında bir neçə məsələ xüsusi müzakirə olunmuşdur. İlk olaraq, Prezident İlham Əliyevin AŞPA-nın sessiyasındakı çıxışından başlamaq istəyirəm. Qeyd edim ki, Assambleyanın üzvü Tini Koks Prezidentə ünvanladığı sualın cavabından çox məmnun qalmışdır. Çünki onun “Azərbaycanda insan hüquqları ilə bağlı müzakirələrin Avropa Şurası mütəxəssislərini dəvət etməklə ölkə daxilində davam etdirilməsinə necə baxırsınız?” sualına cənab Prezidentin cavabı ondan ibarət oldu ki, biz insan hüquqları ilə bağlı məsələnin geniş şəkildə müzakirəsinin tərəfdarıyıq. Bu işdə biz sizə yalnız dəstək ola və kömək göstərə bilərik. Bu məsələ büroda geniş müzakirə olundu və dəstəkləndi. Ümumiyyətlə, cənab Prezidentin AŞPA-dakı çıxışı büroda xüsusi vurğulandı. Hesab edirəm ki, bunun təsiri kimi də büro bir neçə mühüm qərar qəbul etdi.
Bilirsiniz ki, bu sessiya müddətində AŞPA sədrinin sessiyanın birinci iş günü Azərbaycanda insan hüquqlarına dair məruzənin düzgün istiqamətə yönəltməməsi ilə bağlı verdiyi qərar təhlil olunmaq üçün Assambleyanın prosedur qaydaları komitəsinə göndərildi. AŞPA sədrinin təklif etdiyi qərar Avropa Şurasının qaydalarına uyğun olmadığına görə, habelə o qərarda müəmmalılıq olduğundan, eləcə də gələcəkdə belə bir halın baş verməməsi üçün yenidən Şuranın prosedur qaydaları komitəsinə göndərilir. Dünən AŞPA sədri Ann Brasör jurnalistlərlə görüşündə bildirmişdir ki, hər şey prosedur qaydalarına uyğun keçib. Bu gün büroda bütün məsələlər, o cümlədən mənim sədrin bu davranışından sonra AŞPA-ya ünvanladığım məktub da müzakirə olundu. Müzakirələrdə büro üzvləri məsələ qaldırdılar ki, AŞPA sədri bu cür həssas məsələlərə diqqətlə yanaşmalıdır və qərarda müəmmalılıq olduğuna görə o, qanunlar və prosedur qaydaları komitəsinə göndərilir ki, gələcəkdə bir də belə hallar olmasın. Biz 24 saat ərzində şahidi olduq ki, AŞPA-nın qəbul etdiyi qərar insan haqları və hüquqi məsələlər komitəsində yenidən ləğv olundu. Bu məsələ Azərbaycan üzrə həmməruzəçi Pedro Aqramunta tapşırıldı. Bu, belədir və belə də olmalıdır. Ancaq hər bir halda biz bu məsələni axıradək araşdırdıq və bu gün AŞPA bürosu tamamilə düzgün qərar qəbul etdi ki, quruma üzv ölkələrin nümayəndələri ilə davranış, üzv ölkənin təklif etdiyi məsələyə münasibət ehtiyatla və obyektiv şəkildə olmalıdır.
Bundan əlavə, qeyd edim ki, bir neçə sənəd təklif olunmuşdur. Nümayəndə heyətimizin üzvü Elxan Süleymanovun təqdim etdiyi qətnamə layihəsi üçün iki təşəbbüs və bundan başqa, Dağlıq Qarabağla bağlı bir təşəbbüs də vardır. Bu gün AŞPA yay tətili ərəfəsində özünün sonuncu iclasını keçirdi. Heç bir sənəd gündəmdən çıxmadı. Belə bir təhlükə var idi ki, onlar gündəmdən çıxacaqdır. Amma bütün məsələlərin, o cümlədən E.Süleymanovun təqdim etdiyi üç sənəd də büronun sentyabrdakı iclasında müzakirə olunacaqdır.
Xüsusi qeyd olunmalıdır ki, AŞPA sədrinin etdiyi hərəkətlər Avropa Şurasının ümumi ab-havasına uyğun olmadığına və prosedur qaydalara tam şəkildə cavab vermədiyinə görə bu qərarın prosedur qaydaları üzrə komitədə araşdırılması mütləq lazımdır. Bunun araşdırılması büroda qərar kimi qəbul olundu.
Elxan Süleymanovun Dağlıq Qarabağla bağlı qaldırdığı məsələlərə dair bir neçə təklif çox vacib və mühüm olduğuna, eləcə də tətil olduğuna görə, qərara alındı ki, hər üç təşəbbüs gündəmdən çıxarılmaması şərti ilə sentyabr ayında müzakirə olunsun.
Əsgər Əliyev
AZƏRTAC-ın xüsusi müxbiri
Strasburq
Bölmənin digər xəbərləri
