AŞPA-NIN DAĞLIQ QARABAĞ HAQQINDA QƏTNAMƏSİ ERMƏNİSTANIN XARİCİ SİYASƏTİNİN CİDDİ UĞURSUZLUĞUDUR
Bu fikri Ermənistan Milli Məclisinin AŞPA-dakı nümayəndə heyətinin və parlamentin “Ədalət” fraksiyasının üzvü Şavraş Koçaryan söyləmişdir. O demişdir: “Dağlıq Qarabağ məsələsində beynəlxalq rəy 1995-ci ilədək ermənilərin xeyrinə olmuşdur. Lakin 1995-ci ildən ab-hava pisləşməyə başlamışdır”.
Ş.Koçaryan Azərbaycanın diplomatik səylərini yüksək qiymətləndirərək bildirmişdir ki, bunların sayəsində ölkə beynəlxalq aləmdə əlverişli mövqelər qazanmışdır. Belə ki, Azərbaycanın “işğal olunmuş ərazilər” məsələsini münaqişənin həllinin bütün problemindən ayırmağı nəzərdə tutan ardıcıl taktikası özünü tamamilə doğrultmuşdur. Deputatın fikrincə, “Dağlıq Qarabağın iştirakı olmadan Ermənistanın Azərbaycanla apardığı danışıqlar və vahid dövlət haqqında bəyanatlar Azərbaycana münaqişəni ərazi mübahisəsi kimi təqdim etməyə əsas vermişdir”.
Ş.Koçaryan bildirmişdir ki, AŞPA-nın Dağlıq Qarabağ haqqında 25 yanvar tarixli qətnaməsi münaqişə tərəflərinin Ermənistan və Azərbaycan olduğunu və Ermənistanın Azərbaycan ərazisini işğal etdiyini göstərən ilk beynəlxalq sənəddir. Onun sözlərinə görə, bu sənəd Ermənistanın xarici siyasətinin ciddi uğursuzluğu və bir çox illər ərzində diplomatiya sahəsində səhv addımlar atılmasının nəticəsidir. O demişdir: “AŞPA-nın qətnaməsi Azərbaycan üçün tamamilə məqbuldur və burada Ermənistan üçün sərfəli olan heç bir bənd yoxdur”.
Bölmənin digər xəbərləri
