ELM VƏ TƏHSİL
Aşqarlar Kimyası İnstitutunun gənc tədqiqatçısı dizel mühərrikləri üçün yeni sürtkü kompozisiyaları yaradıb
Bakı, 28 fevral, AZƏRTAC
AMEA-nın (AMEA) akademik Əli Quliyev adına Aşqarlar Kimyası İnstitutunun gənc tədqiqatçısı Aida Yusifovanın “İşlənmiş yağların regenerasiyası və onlar əsasında müxtəlif təyinatlı dizel mühərrikləri üçün yeni sürtkü kompozisiyalarının yaradılması” mövzusunda yerinə yetirdiyi kimya üzrə fəlsəfə doktoru dissertasiya işinin ilkin müzakirəsi keçirilib.
Aşqarlar Kimyası İnstitutundan AZƏRTAC-a bildirilib ki, tədqiqatçı Aida Yusifova professor Həqiqət Cavadova və kimya üzrə fəlsəfə doktoru Kamal Kərimovun rəhbərliyi altında işlənmiş sürtkü yağlarının regenerasiya texnologiyasını hazırlayıb. Bu texnologiya əsasında regenerasiya olunan yağlar əsasında dizel mühərrikləri üçün yeni sürtkü kompozisiyalarının elmi və tətbiqi əsasları işlənib.
Hazırlanan və ekoloji cəhətdən gərginlik yaradan işlənmiş sürtkü yağlarının regenerasiya texnologiyası və onun əsasında yeni sürtkü kompozisiyalarının yaradılması AMEA-nın Yüksək Texnologiyalar Parkında tətbiq olunacaq və proses hazırda icra mərhələsindədir.